Қаз
Рус
"Елдің еті үйреніп қалған". Торғай даласына ракета бөлшегі құлады
295
Оны жергілікті тұрғындар суретке және видеоға түсіріп алып, әлеуметтік желілерге таратып жатыр, деп хабарлайды Opennews.kz ақпарат агенттігі Экспресс К сайтына сілтеме жасап.
Kommersant.ru мәліметінше, "Союз-2.1б" зымыраны Байқоңыр ғарыш айлағынан 9 тамыз күні сағат 08:52-де ұшырылған.
"Басты миссиясы — ирандық "Хайям" спутнигін және басқа 16 кіші жерсеріктерін орбитаға алып шығу. Ракета ұшырылғаннан кейін бірнеше минут өткен соң "Фрегат" үдету блогы құрамындағы басты блок зымыранның үшінші деңгейінен бөлініп түсті. Ары қарай "Фрегат" орбитаға жол тартты", — делінеді сайт хабарламасында.
Жангелдин ауданы аумағына түскен ракета бөлшегінің суреті мен видеосын жергілікті тұрғындар мессенджерлерде белсенді таратып жатыр. Олардың айтуынша, бөлшектің құлауынан далада пайда болған өртті сөндіруге көршілес Амангелді ауданы Төтенше жағдайлар бөлімінің қызметкерлері шақыртылған.
Айта кетейік, осыдан бірер күн бұрын ғана Нұрман Емберген есімді Facebook тұтынушысы ракета қалдықтарының Ақкөл ауылы маңына құлағаны туралы жазған еді.
"Тасыр-тұсыр. Гүрс-гүрс. Сұмдық екен. Үш жерден көтерілген "саңырауқұлақ" түтін. Алғаш көруім. Түскі сағат 12-де ракета құлайды деп елге хабарланды. Алдын ала дайындық жұмысы жүргізіледі екен. Ел кәдімгідей төселіп қалыпты, еттері үйренген. Мал-жандарын түгендеп, қалдық құлайтын аумаққа кетпеуін қадағалап, күйбең тірлігін жасап жатты. "Алла бас амандығын берсін. Өртке ұласып кетпесе екен. Қайран, соры мықты Торғайым" деді қасымдағы ақсақал", — деп жазды ол.
