RUB (-0.03) 8.24 KZT
USD (+1.53) 478.9 KZT
EUR (-0.40) 459.98 KZT
Қоғам
83

Абай облысында қызметтік борышын өтеу кезінде өрт сөндіруші көз жұмды


Төтенше жағдайлар министрлігі дала өртін сөндіру кезінде “КАМАЗ” бен автоцистерна отқа оранып, өрт сөндіруші Айдос Тоғызбаевтың көз жұмғанын мәлімдеді, деп хабарлайды Opennews.kz ақпарат агенттігі Stan.kz ке сілтеме жасап. 


Хабарламаға сәйкес, 2022 жылдың 7 қыркүйегінде 13:35-те 112 кезекші пультіне Абай облысы Жарма ауданының Бозжыра ауылдық округі Бірінші ауылының учаскесінде құрғақ шөп жанып жатқаны туралы хабарлама келіп түскен. Шақыру орнына №22 өрт сөндіру бекетінің қызметкерлері жіберілді. 
Оқиға орнына келген өрт сөндірушілер дереу өртті сөндіруге кірісті. Осы кезде жел бағытының өзгеруі салдарынан өрт автоцистернаға қарай аумақты шарпыған. Техникаға арналған эвакуациялау жолдары барлық жағынан отқа оранып, биіктігі екі метр қараған ағашы өртенген.  


“Өрт сөндірушілер жағдайды бағалап, өрт-техникалық жарақты жинауды тоқтатып, шұғыл эвакуациялауға кірісті. Автоцистерна мен КАМАЗ су тасымалдаушы көлігі толығымен жанып кетті. Нәтижесінде өрт сөндіру бекетінің бөлімше командирі Амангелді Тұрлыбеков пен өрт сөндіру бекетінің жүргізуші-қызметкері Айдос Тоғызбаев, өрт сөндіруші-құтқарушы Нұрлан Салимжан түрлі дәрежедегі күйік алып, Жарма ауданы Шар қалалық ауруханасына жатқызылды”, – делінген ақпаратта. 

Өрт аумағы 500 гектарға тең, өрт 8 қыркүйекте сағат 5.40-та сөндірілді. Жалынды сөндіруге Төтенше жағдайлар департаменті мен жергілікті атқарушы органдардың жеке құрамынан 14 адам мен 5 бірлік техника жұмылдырылған. Қазіргі таңда оқиғаның мән-жайы анықталуда.


“Айдос қатты күйік алып, жарақатынан ауруханада көз жұмды. Қызметтік борышын орындау кезінде көрсеткен батылдығы мен жанқиярлық ерлігі үшін азаматтық қорғау сержанты Айдос Ерұланұлы Тоғызбаев қаза тапқаннан кейін ІІІ дәрежелі "Айбын" мемлекеттік наградасына ұсынылды”, – делінген ТЖМ ұсынған мәліметте. 

Марқұм 36 жаста болған. Азаматтық қорғау органдарында 2019 жылдан бастап қызмет еткен. Оның артында әйелі мен 5 баласы қалды.