3 балабақшаны қатар басқарған әйел 19,3 млн теңге жымқырған

Шымкентте балабақша меңгерушісі балалардың сабаққа қатысу есебіне жалған мәліметтер енгізіп, бюджет қаржысын қалтасына басқан, - деп хабарлайды Opennews.kz ақпарат агенттігі.


Қаржылық мониторинг агенттігі баспасөз қызметінің мәліметінше, заңсыз әрекет 2019 жылдан 2021 жылға дейін 3 жыл бойы жүргізілген. Ол «Балапан» бағдарламасы бойынша мектепке дейінгі білім беруді жан басына шаққандағы қаржыландыруға бөлінген 19,3 миллион теңге бюджет қаражатын заңсыз жымқырған.

ҚМА Шымкент қаласы бойынша департаменті 3 балабақша меңгерушісі болып қызмет еткен әйелге қатысты сотқа дейінгі тергеуді аяқтады.

Ол кінәлі деп танылып, 5 жылға шартты түрде бас бостандығынан айыру жазасына кесілді. Мемлекетке келтірілген 19,3 млн теңге залал толығымен өтелді.