"Барыс" өз айдынында "Сибирьді" тартысты ойында тізе бүктірді

Астана қаласының "Барыс" хоккей командасы Құрлықтық хоккей лигасы аясындағы кезекті кездесуін өз мұз айдынында өткізіп, Ресейдің "Сибирь" (Новосібір) клубын 6:4 есебімен тізе бүктірді, - деп хабарлайды "Opennews.kz" ақпарат агенттігі.

Ойын басталысымен қонақтар шабуылды үдете түсіп, алғашқы бес минутта екі шайба соқты. Алдымен Роман Калиниченко, артынша Скотт Уилсон нәтижелі соққыларымен есепті 0:2-ге жеткізді. Алайда "Барыс" командасы жылдам ес жиып, 8-минутта Семён Симонов, ал 22-минутта Дмитрий Бреус шайбаларын соғып, есепті теңестірді.

Бірақ көп ұзамай "Сибирь" қайта алға шықты. 23-минутта Никита Сошников, 27-минутта Владислав Кара гол соғып, есеп 2:4 болды. Дегенмен алаң иелері бұл жолы да қайсарлық танытып, 30-минутта Джейк Масси, 37-минутта екінші шайбасын соққан Семён Симоновтың арқасында таразы басын қайта теңестірді — 4:4.

Шешуші үшінші кезеңде "Барыс" толық үстемдікке ие болды. 48-минутта Иэн Маккошен, ал 58-минутта Мэйсон Морелли қарсылас қақпасын дәл көздеп, матчтың соңғы нүктесін қойды — 6:4.

Бұл жеңістің нәтижесінде "Барыс" өз ұпайын 9-ға жеткізіп, турнирлік кестеде 13-орынға көтерілді. Ал "Сибирь" 8 ұпаймен 17-сатыда қалды.