Жас ақын Нұрахметтің жемісті жеңісі

Нұрахмет Мансұров облыстық білім басқармасының ұйымдастыруымен өткен «Тәуелсіздігім – тұғырым» тақырыбында оқушылар арасындағы ақындар айтысының облыстық кезеңінде ІІ орын иеленіп, республикалық кезеңге жолдама ұтып алды, - деп хабарлайды "Opennews.kz" ақпарат агенттігі.

Айтыстың ашылуына басқарма басшысы Асқарбек Есжанов қатысып, ұлттық құн­ды­лығымыздың ажырамас бөлшегі бол­ған айтыс өнерінің маңызын түсіндіріп, ғасырлармен қанаттасып, дәуірлермен үнде­сіп, заманамен тілдесіп келе жатқан кемел дүние екендігін, кейінгі ұрпаққа берер тағы­лымын атап көрсетіп, қатысушыларға сәттілік тіледі.

Сайыстың облыстық кезеңінде барлығы 8 ақын бақ сынады. Олар «Ақындар айтысы» сайысының қалалық, аудандық кезеңінің жеңімпаздары. Ақындар айтысы ұлттық рух пен патриотизмді, өз халқына және оның дәстүрлеріне құрмет сезімін тәрбиелеу, айтысты қазақ халқының ұлт­тық құндылығы, шешендік өнердің баға жет­пес мұрасы ретінде дәріптеу арқылы дарын­ды шығармашыл жастарды анықтау мақсатында ұйымдастырылды.

Оқушылардың шығармашылық қабіле­тін дамыту, ұлттық дәстүрімізді дәріптеу мақсатында ұйымдастырылған сайыс­та ауданымыздың абыройын Нұрахмет Бағдатұлы асқақтатып, көрермендерді өз өнері­мен тәнті етіп, жүлделі ІІ орын иеленді.

Нұрахмет – Сырдария аудандағы №137 орта мектептің 11-сынып оқушысы. Жас өнер­паздың ұстаздарының айтуынша, ол тек талантты ғана емес, сондай-ақ білімді әрі тәрбиелі оқушылардың бірі. Сонымен қоса мектепте үнемі түрлі іс-шаралар мен қоғамдық жұмыстардың басы-қасынан табыла білетін белсенді оқушы. Нұрахмет бұған дейін де облыстық, республикалық, халықаралық деңгейдегі түрлі байқауға қатысып, жеңімпаз атанып, аудан ме­рейін асқақтатып жүрген өнерпаз. Нұрахмет­тің бойындағы ақындық қасиеті әкесі­нен, ауданы­мыздың білім саласында ойып тұрып орын алған марқұм Бағдат Есназардан дарыған. Бағдат Мансұрұлы көзі тірісінде Нұрахмет­ті үнемі қолдап, қол­паштап, қандай байқау болсын жанынан табылып, әкелік, ұстаздық мейірімін төгіп, жол көрсетіп, оның бүгінгідей талантты, талапты болуына бірден-бір себепкер жанның бірі. Бір сөзбен айтқанда, оның өмірдегі де, өнердегі де ұстазы – Бағдат ағайымыз еді. Нұрахметтің ұстаздары оның болашағынан үлкен үміт күтіп, зор сенім артады.

Тағы бір қуанышты жаңалықтың бірі – республикалық кезеңге жолдама алған Нұрахмет Астана төрінде ҚР Оқу ағарту министрлігінің қолдауымен, Л.Гумилев атындағы Еуразия ұлттық университетінің ұйым­дастыруымен мектеп оқушылары арасында «Егемендік елдігім» атты респуб­ликалық «Қола домбыра – 2024» жас ақындар айтысында Сыр елінің намысын қорғап, «AMANAT» партиясының арнайы жүлдесін ұтып алды.

Егемен еліміз жеткен жетістіктерді насихаттау, мектеп қабырғасындағы жас ақын­дардың ішкі мүмкіндігін ашып, шабытына қанат бітіру, айтыскерлер арасынан жаңа есімдер тауып, дарынды жастарды қолдау мақсатында алғаш рет өткізілген дүбірлі додаға 22 ақын қатысып, айтыстың алғаш­қы күні 11 жұп болып бақ сынады. Суырып-салма өнерді қолдау үшін айтыс ақындары мен жыршы-термешілердің халықаралық одағы басқармасы төрағасының бірінші орынбасары, ҚР Парламенті Мәжілісінің депутаты, Қазақстанның еңбек сіңірген қайраткері, филология ғылымдарының докторы Аманжол Әлтаев арнайы ат басын бұрып, жас өрендерге сәттілік тіледі. Ережеге сәйкес 22 ақыннан іріктелген 8 жұп келесі кезеңге өтті. Жас ақындар түрлі әлеуметтік тақырыптарды қозғай отырып, аламан айтысты жандыра түсті.Бұл айтыс — жастардың әдебиетке деген қызығушылығын, ұлттық өнерді дәріптеу және ақындық өнерді насихаттау мақсатында өткізілетін ауқымды шаралардың бірі. Облыс көлемінде  айтысқа оқушылар қатысып, ой ұшқырлығын және шешендік қабілетін көрсететін ерекше туындыларын ұсынды. Жас ақындар еліміздің тәуелсіздігіне деген сүйіспеншіліктерін өлең арқылы білдірді. Айтыс барысында ол тек өлеңмен ғана емес, шешендік өнерімен де жұртшылықты таңғалдырды. Жас ақын тәуелсіздіктің қадірі мен маңызын жеткізіп, өз туындысында ел болашағына деген үміт пен сенім ұялатты.

Орақ ауызды кіл жүйріктердің сайысына айтыскер ақын, «Алтын домбыра» иегері Еркебұлан Қайназаров, айтыскер ақын Иран Ғайып Күзембаев, ҚР Парламент Мәжілісінің депутаты, қазылар алқасының төрағасы Ринат Зайытов, тағы басқалар төрелік жасап, шын жүйріктердің өнеріне әділ бағасын берді. Барлық қатысушыларға Алғыс хат және қаржылай сыйлық, ақын­дардың тәлімгер-ұстаздарына ҚР Оқу-ағарту министрінің Алғыс хаты табыс­талды. Айтыскерлерді марапаттау салтанатында сөз алған ҚР Оқу-ағарту министрі Ғани Бейсенбаев мектеп оқушылары арасында өтетін бұл айтыстың ауқымын алдағы жылы кеңейте түсетінін айтса, Л.Гумилев атындағы Еуразия ұлттық университетінің ректоры Ерлан Сыдықов республикалық «Қола домбыра» оқушылар айтысының жыл сайынғы жеңімпазы ЕҰУ-ға тегін қа­был­дана­тынын жеткізді.