Жаңақорғанда Конституция күні мерекесі тойланды

1 қыркүйек 2025, 15:55

2 293

29 тамыз күні М.Көкенов атындағы аудандық мәдениет үйінде Қазақстан Республикасы Конституциясының 30 жылдығына арналған «Конституция – бейбітшілік пен тұрақтылықтың кепілі» атты салтанатты мерекелік іс-шара өтті, - деп хабарлайды "Opennews.kz" ақпарат агенттігі.

Айтулы дата – ел тарихындағы маңызды белес. Себебі Конституция – тәуелсіз Қазақстанның құқықтық іргетасы, мемлекеттілігіміздің кепілі, қоғам мен билік арасындағы үйлесімді байланысты қалыптастыратын басты құжат.

КОНСТИТУЦИЯ – ҚОҒАМНЫҢ НЕГІЗГІ ЗАҢЫ

Салтанатты жиында аудан әкімі Мажит Самитов сөз алып, барша аудан тұрғындарын Ата Заңның 30 жылдығымен құттықтады.

– Конституция – егемен еліміздің мемлекеттілігін, тəуелсіздігін, демократиялық құндылықтарын айғақтайтын аса маңызды құжат. Оның басты тірегі – халық бірлігі, қоғамдық жəне рухани келісім, саяси тұрақтылық секілді ерекше құндылықтар. Бүгінде Ата Заңымыздың арқасында мемлекетіміз орнықты дамып, экономикамыз өрлеп, азаматтардың әл-ауқаты артып келеді, – деді аудан басшысы.

ЕРЕН ЕҢБЕК ЕЛ ЕСІНДЕ

Шара барысында ауданның әлеуметтік-экономикалық дамуына сүбелі үлес қосып жүрген сала қызметкерлері алғыс хаттармен және мерекелік марапаттармен марапатталды. Бұл – ел дамуына аянбай еңбек етіп жүрген азаматтарға деген шынайы құрметтің белгісі.

АНТ ҚАБЫЛДАҒАН ЖАС МАМАНДАР

Салтанатты жиынның тағы бір маңызды сәті – мемлекеттік қызметке жаңадан келген жас мамандардың ант қабылдау рәсімі болды. Олар Қазақстан Республикасының Конституциясына және заңдарына адал болуға, елге қалтқысыз қызмет етуге салтанатты түрде ант берді.

Бұл – жас буынның ел тағдырына деген жауапкершілігін арттырып, мемлекеттік қызметке деген сенім мен құрметтің айғағы.

МЕРЕКЕЛІК КӨҢІЛ-КҮЙ, ПАТРИОТТЫҚ РУХ

Іс-шара соңы аудан өнерпаздарының концерттік бағдарламасына ұласты. Сахнада рухты көтеретін патриоттық әндер шырқалып, елдік пен бірлікке үндеген мазмұнды қойылымдар қойылды. Жиналған көпшілік көтеріңкі көңіл-күймен тарасты.

30 жылдық межесі – еліміздің жеткен жетістіктерін саралап, болашаққа тың серпінмен қадам басатын кезең. Аудан көлемінде өткен бұл мерекелік іс-шара – Конституцияның қоғам өміріндегі маңызын дәріптеп қана қоймай, ұрпақты елжандылық пен заңға деген құрметке тәрбиелеудің үлгісі болды.