Келесі жылдан бастап бір доллардың құны 610 теңгеге дейін көтерілуі мүмкін
Halyk Finance талдаушыларының жаңа есебі бойынша, жыл соңына дейін теңге бағамы 550–560 теңге аралығында қалыптасуы ықтимал. Ал 2026 жылы бір доллардың құны 600–610 теңгеге дейін көтерілуі мүмкін деген болжам жасалды, - деп хабарлайды "Opennews.kz" ақпарат агенттігі.
Сарапшылардың мәліметінше, ұлттық валютаның әлсіреуіне мұнай бағасының төмендеуі, сондай-ақ Ұлттық қордан шетел валютасын сату көлемінің қысқаруы әсер етуі мүмкін.
Halyk Finance компаниясының үшінші тоқсанға арналған есебінде қыркүйек айының соңында доллар бағамы 549,07 теңгеге жеткені, яғни айлық негізде 1,9 пайызға әлсірегені көрсетілген. Тоқсан ішіндегі орташа айырбас бағамы – 536,05 теңге деңгейінде болған.
Мұнай нарығындағы жағдай салыстырмалы түрде тұрақты: барреліне шамамен 69 доллар көлемінде сақталған. Дегенмен, ірі инвестициялық жобалардың жүзеге асуы және шетел валютасына деген сұраныстың артуы теңге бағамына қысым түсірген. Сонымен қатар валюта нарығындағы өтімділік пен сауда белсенділігі төмен деңгейде қалып отыр.
Halyk Finance сарапшыларының есебі бойынша, 2025 жылдың соңына қарай доллар бағамы 550–560 теңге аралығында болады деп күтілуде.
Оған әсер ететін негізгі факторлар ретінде:
- Ұлттық қордан валюта сату көлемінің азаюы,
- импорт көлемінің артуы аталды.
Сонымен қатар, сарапшылардың пікірінше, Ұлттық банктің алтын сату және сатып алу операциялары, сондай-ақ валюталық өтімділікті стерилизациялау көлемінің ұлғаюы ұлттық валютаны белгілі бір деңгейде қолдап отырады.
2026 жылы теңге бағамының одан әрі әлсіреп, бір доллар үшін 600–610 теңге деңгейіне жетуі мүмкін.
Мұндай динамикаға ықпал ететін негізгі себептер:
- әлемдік мұнай бағасының төмендеуі,
- экспорттан түсетін кірістердің азаюы,
- Ұлттық қордан бөлінетін валюталық трансферттердің қысқаруы.
Бұл факторлар ішкі валюта нарығында сұраныс пен ұсыныс арасындағы теңгерімсіздікті күшейтіп, теңгеге қысым түсіруі ықтимал.
Halyk Finance 2025 жылдың соңындағы инфляция деңгейін 11,5–12,5 пайыз аралығында болжайды. Ал 2026 жылы бұл көрсеткіш 10,5–11,5 пайызға дейін төмендейді деп күтілуде.
Бағаның өсуіне коммуналдық тарифтердің көтерілуі, қосылған құн салығының ұлғаюы және салық саясатының өзгерістері әсер етуі мүмкін.
Алайда 2026 жылдың екінші жартысынан бастап бұл факторлардың әсері біртіндеп әлсірейді.
Экономикалық өсім тұрғысынан алғанда, 2025 жылы ЖІӨ өсімі 5,6 пайыз деңгейінде сақталуы күтілуде. Ал 2026 жылы мұнай бағасының төмендеуі мен ішкі тұтынудың баяулауы салдарынан экономикалық өсімнің 4,5 пайызға дейін төмендеуі ықтимал.
