Қызылордадағы балабақшада бүлдіршін қайнаған суға күйіп қалған
1 623
Қызылордадағы балабақшалардың бірінде бір жарым жастағы қыз қайнаған суға күйіп қалды, - деп хабарлайды "Opennews.kz" ақпарат агенттігі.
22 мамыр күні Қызылорда қаласындағы жекеменшік балабақшалардың бірінде балақай қайнаған суға күйіп қалды. Оқиға туралы зардап шеккен баланың анасы мәлімдеді. Оның айтуынша, бұл жағдай тәрбиеші мен күтушінің салғырттығынан болған.
"Менің қызым - Шардарбек Еркежан (2023 жылы туған) - тәрбиеші мен күтушінің әрекетінен қайнаған суға күйіп қалды. Нәтижесінде, Еркежанның денесінің 40 пайызын 1, 2 және 3 дәрежелі күйіктер шалды. Ол ауыр жағдайда реанимацияға түсті, қазіргі таңда палатаға ауыстырылды, бірақ жағдайы әлі де күрделі. Біз, ата-аналар ретінде, бұл жағдайдың әділ тергелуін, кінәлі тәрбиеші мен күтушіні ғана емес, балабақша басшылығы мен Қызылорда қалалық білім бөлімінің жауапты тұлғаларын да жауапкершілікке тартуды талап етеміз. Мұндай қайғылы жағдай ешбір бала мен ата-ананың басына түспеуі тиіс. Балабақшаларға, өрт қауіпсіздігіне және санитарлық жағдайға бақылау күшейтілуі керек", - деп зардап шеккен қыздың анасы үндеу жасады.
Балабақша меңгерушісі оқиғаға байланысты қызметтік тексеру жүргізіліп, кінәлі деп танылған екі қызметкердің жұмыстан босатылғанын хабарлады. Оның айтуынша, мекеме зардап шеккен баланың анасымен байланыста болып, жағдайға қатысты көмек көрсетіп жатыр.
