Ветеринар мамандарын 11 жоғары оқу орны даярлайды
ҚР Сенатында өткен Үкімет сағатында Ауыл шаруашылығы вице-министрі Аманғали Бердалин елдегі ветеринариялық кадрлар даярлау мәселелері туралы мәлімдеді,-деп хабарлайды Opennews.kz ақпарат агенттігі.
Вице-министрдің айтуынша, қазіргі таңда «Ветеринария» бағыты бойынша кадрлар даярлауды 11 жоғары оқу орны жүзеге асырады, оның ішінде үшеуі Ауыл шаруашылығы министрлігінің жүйесінде. 2025 жылға бағытталған 1001 гранттың 77,5%-ы осы оқу орындарына бөлінген. Жалпы конкурс бойынша өту балы — 62, ал ауылдық квота бойынша — 56 балл.
Аманғали Бердалин атап өткендей, Ауыл шаруашылығы мен Ғылым және жоғары білім министрліктері ветеринариялық кадрлар даярлау сапасын арттыруға бағытталған жұмыс тобын құрды. Оның негізгі міндеттері:
«Ветеринария» бағыты бойынша студенттерге стипендияны педагогикалық бағыттағы студенттер деңгейіне дейін арттыру;
Ветеринария мамандарын даярлайтын жоғары оқу орындарына түсу үшін Ұлттық бірыңғай тестілеу балдарын біртіндеп көбейту;
Ауылдық квотаны 30%-дан 70%-ға дейін ұлғайту;
Ауыл шаруашылығы тауарын өндірушілер жіберетін нысаналы гранттардың үлесін арттыру;
Мемлекеттік тапсырысты заманауи материалдық базасы, жабдықтары және ғылыми-педагогикалық кадрлары бар жоғары оқу орындарына шоғырландыру;
Бір жылдық оқу мерзімімен 3 жыл ішінде мемлекеттік тапсырыс негізінде бейінді магистратура арқылы кадрларды қайта даярлау.
Вице-министр сондай-ақ заманауи ветеринариялық зертханалық жабдықтарда жұмыс істей алатын, ветеринариялық қауіпсіздік процестерін талдай алатын және өз саласы бойынша маманданатын білікті кадрларды даярлау қажеттігін атап өтті. Сонымен қатар, Мемлекет басшысының тапсырмасына сәйкес, Республикалық бюджет комиссиясы ветеринария мамандарының жалақысын көтеру үшін 22 млрд теңге қаржыландыруды бекітті.
