ЕЛІМІЗДЕ АЛҒАШ РЕТ "АНАЛАР КҮНІ" МЕРЕКЕСІ АТАЛЫП ӨТІЛУДЕ

Бүгінгі мерекелік шараны облыстық Қоғамдық даму басқармасының басшысы А.Есмаханов облыс әкімі Н.Нәлібаевтың алтын құрсақты аналарды құттықтау лебіздерінен бастады, - деп хабарлайды "Opennews.kz" ақпарат агенттігі.

Аталған шараға Қызылорда қаласынан және облыстың 7 ауданынан «Алтын алқа» және «Күміс алқа» иегерлері қатысты. Аналарға деген құрметтің, ілтипаттың, құттықтаудың шектеулі мерзімі жоқ. 

Шара барысында Алтын құрсақты ана, 10 баладан, 31 немере, 26 шөбере сүйіп отырған батыр ана Есекеева Балай Нәбиқызы (82 жаста, сауыншы, ауылдық кеңес депутаты болған, қазіргі таңда Әжелер ансамблінің мүшесі, Сырдария ауданының тұрғыны) және «Алтын алқа» иегері, 7 бала, 25 немере, 3 шөбере сүйіп отырған Сыздықова Жақсыгүл Смайлқызы (72 жаста, білім саласының ардагері, Шиелі ауданының тұрғыны) сөз сөйлеп, барша аналарға мерекелік құттықтау лебіздерін жеткізді. Сондай-ақ, жас батыр ана, «Алтын алқа» иегері, 7 баланың анасы Нұрғалиева Майра Мирғалиқызы (34 жаста, «Айбибі» балабақшасының меңгерушісі, Қызылорда қаласының тұрғыны) қоғамдық өмірде аналық парыз бен кәсіпті бірге алып жүру дағдылары туралы тәжірибесімен бөлісті. 

Сонымен қатар, «Анаға тағзым» орталығының директоры Молжанова Алтынай Бекмағамбетқызы облыста аналарға қолдау көрсету мақсатында атқарылып жатқан жұмыстар туралы хабарлама жасады. 

Мерекелік шараға қатысушыларға облыс әкімінің атынан бағалы сыйлықтар мен гүлшоқтары табысталды. 

Аталған шара концерттік бағдарламамен жалғасын тауып, қатысушылар естелік фотоға түсті.