Қызылорда полицейі болашақ чемпиондарды тәрбиелеуде
Профилактика жылы аясында Қызылорда облысы полиция департаментінің Сырдария ауданы полиция бөлімі 10-14 жас аралығындағы балалар арасында кіші футболдан жарыс ұйымдастырды, - деп хабарлайды "Opennews.kz" ақпарат агенттігі.
Аталған спорттық іс-шара жасөспірімдер арасында құқықбұзушылықтың алдын алу, салауатты өмір салтын насихаттау және олардың бос уақытын тиімді өткізу мақсатында өткізілді.
Тәртіп сақшылары тек қана қоғамдық тәртіпті күзетіп қоймай, өскелең ұрпақтың тәрбиесіне де белсене атсалысып келеді. Осындай игі бастамалардың бірі – спорт арқылы жасөспірімдердің қызығушылығын арттырып, дұрыс бағыт-бағдар беру.
Қызмет барысында болашақтан зор үміт күттіретін жас спортшылар анықталып, олардың талантын шыңдауға мүмкіндік жасалды. Полицейлер балаларға үлгі көрсетіп, оларды тәрбиелеуде тек сөзбен емес, іспен дәлелдеп келеді.
