Қызылордадағы президент саябағы жаңа келбетке ие болады

Бүгін, 15:06

1 546

Бүгін Қызылорда облысының әкімі Нұрлыбек Нәлібаев қаладағы Президент саябағында жүргізіліп жатқан қайта жаңғырту және абаттандыру жұмыстарының барысын аралап көрді, - деп хабарлайды "Opennews.kz" ақпарат агенттігі.

Бұл жобаның басты мақсаты – қала тұрғындары мен қонақтарына арналған заманауи демалыс және мәдениет кеңістігін қалыптастыру.

Ауқымды жаңғырту жұмыстары жүріп жатыр

Қазіргі таңда саябақ аумағында ауқымды инфрақұрылымдық және көріктендіру жобалары жүзеге асырылуда. Бас мердігер – «Bi Global» ЖШС. Компания жобалық жоспарға сәйкес, демалыс аймағын көпфункционалды қоғамдық кеңістікке айналдыруда.

Саябақ аумағында:

3 аллея, 6 субұрқақ, 5 амфитеатр,
7 балалар ойын алаңы, 4 спорт, 4 workout алаңы,
7 демалыс аймағы, 4 фудкорт,
теннис үстелдері, би алаңы, стритбол, вело және жүгіру жолақтары,
сахна, сарқырама каналдары, олардың үстінен өтетін көпірлер,
шахмат, баскетбол, футбол алаңдары,
сондай-ақ биіктігі 50 метр болатын айналмалы дөңгелек аттракцион орналастырылады.

Сондай-ақ, саябақта арқан саябағы мен модульдік санитарлық нысандар салу көзделген. Бұл нысандар келушілердің қауіпсіз әрі жайлы демалуына мүмкіндік береді.

Балалар лагері мен қысқы бақ бой көтеруде

Президент саябағы аумағында төрт мезгіл бойы үздіксіз жұмыс істейтін 300 орындық заманауи балалар тынығу лагері және Ботаникалық білім беру орталығы (қысқы бақ) салынып жатыр.

Аталған нысандардың бас мердігері – «Alem Qurylys AQ» ЖШС. Компания аумаққа спорт және мәдени бағыттағы кешенді инфрақұрылым салуды жоспарлаған. Мұнда:

іс-шараларға арналған event-аймақ,
тұрғын корпустар,
қонақ үй үлгісіндегі шағын ғимараттар,
дәстүрлі киіз үйлер,
ашық бассейн,
стадион және футбол алаңы,
жазғы сахна бой көтермек.

Бұл бастама өңірдегі балалар мен жастардың бос уақытын тиімді өткізуіне және экологиялық білім алуға бағытталған.

Жаңа көпір – жаңа байланыс

Жоба аясында Сырдария өзенінің үстінен жаяу жүргіншілерге арналған көпір салынады. Ол Президент саябағын және Астана шағын ауданын өзара байланыстырады. Бұл көпір қала инфрақұрылымын ыңғайлы етуге және тұрғындар қозғалысын жеңілдетуге үлкен серпін береді.

Қалалықтардың сүйікті орнына айналмақ

Аймақ басшысы Нұрлыбек Нәлібаев жаңғырту жұмыстарының сапасын бақылап, құрылыс қарқынын күшейту қажеттігін атап өтті. Әкімнің айтуынша, жаңа келбетке енетін саябақ тек демалыс орны ғана емес, сонымен қатар мәдени, спорттық және экологиялық бағыттағы ірі қоғамдық кеңістікке айналады.

«Біздің мақсат – Президент саябағын Сыр елінің ең тартымды және заманауи демалыс орталығына айналдыру. Мұнда отбасылық демалысқа, спортқа және мәдени іс-шараларға бар жағдай жасалады», — деді облыс әкімі.

Қызылорда – жаңа форматтағы қала

Қаладағы соңғы жылдары жүзеге асырылып жатқан урбанистік жобалар Қызылорданы жаңа, заманауи форматтағы өңір орталығына айналдыруда. «Қызылорда Арена» спорт кешені, жаңа Орталық стадион, жағалау саябақтары мен инфрақұрылымдық жобалар — осы бағыттағы жүйелі жұмыстың айғағы.

Жаңғыртудан кейін Президент саябағы қала тұрғындары мен қонақтары үшін қоғамдық өмірдің басты орталығына айналмақ.