ҚЫЗЫЛОРДА ОБЛЫСЫНДА КӘСІПОДАҚ БЕЛСЕНДІЛЕРІ ҮШІН ОҚУ СЕМИНАРЫ ҰЙЫМДАСТЫРЫЛДЫ

ҚЫЗЫЛОРДА ОБЛЫСЫНДА КӘСІПОДАҚ БЕЛСЕНДІЛЕРІ ҮШІН ОҚУ СЕМИНАРЫ ҰЙЫМДАСТЫРЫЛДЫ

Қызылорда облыстық мәдениет, спорт, туризм және ақпарат салалық кәсіподағына қарасты ұйымдардың белсенді мүшелері, бастауыш кәсіподақ ұйымдарының жетекшілері, кадр қызметкерлері мен еңбек ұжымдарының өкілдеріне арналған кезекті оқу семинары ұйымдастырылды. Ауқымды оқыту шарасы еңбек қатынастары саласындағы құқықтық сауаттылықты арттыруға, кәсіподақ ұйымдарының жұмысын жетілдіруге және әлеуметтік әріптестік тетіктерін нығайтуға бағытталды.

Семинарға мәдениет, спорт, туризм және ақпарат саласында еңбек ететін кәсіподақ мүшелері, мекеме басшыларының орынбасарлары, кадр қызметінің мамандары, заңгерлер және еңбек қауіпсіздігіне жауапты қызметкерлер қатысты. Іс-шара тәжірибе алмасу мен кәсіби пікірталас алаңына айналып, қатысушылар еңбек саласындағы өзекті мәселелерді жан-жақты талқылады.

Семинардың ашылу рәсімінде Қызылорда облысы аумақтық кәсіподақтар бірлестігі төрағасының орынбасары Марат Бәйімбетов сөз сөйлеп, кәсіподақ жүйесіндегі білім беру жұмыстарының маңыздылығына тоқталды.

– Қазіргі таңда еңбек қатынастары жүйесінде жаңа өзгерістер мен талаптар енгізілуде. Сондықтан кәсіподақ белсенділерінің құқықтық сауаттылығын арттыру, еңбек заңнамасындағы өзгерістерді түсіндіру және әлеуметтік әріптестікті нығайту – маңызды міндеттердің бірі. Осындай оқу семинарлары кәсіподақ ұйымдарының жұмыс тиімділігін арттыруға ықпал етеді, – деді ол.

Сонымен қатар, ол кәсіподақтардың негізгі мақсаты еңбек адамының құқықтары мен мүдделерін қорғау екенін атап өтті. Әлеуметтік тұрақтылықты сақтау мен ұжымдық келісімді нығайтуда кәсіподақ ұйымдарының рөлі ерекше екеніне назар аударды.

Оқыту жұмысын Халықаралық еңбек ұйымының оқу орталығында біліктілігін жетілдірген тәжірибелі тренер-фасилитатор, Қазақстан Республикасы Кәсіподақтар федерациясының дәріскерлер пулының мүшесі Майра Боранбаева жүргізді.

Тәжірибелі маман семинар барысында еңбек қатынастары саласындағы заманауи үрдістер, заңнамалық өзгерістер және еңбек дауларын шешудің тиімді тәсілдері жөнінде жан-жақты ақпарат берді.

Оқу бағдарламасы аясында қатысушыларға бірнеше маңызды бағыт бойынша мазмұнды дәрістер мен тәжірибелік түсіндірмелер ұсынылды. Атап айтқанда:

– 2025–2026 жылдардағы еңбек заңнамасындағы негізгі өзгерістер;

– еңбек заңнамасын қолданудың практикалық тетіктері;

– еңбек дауларын басқару, алдын алу және реттеу жолдары;

– әлеуметтік әріптестік және ұжымдық шарттың рөлі;

– кәсіподақтардың еңбек саласындағы құқықтық мәртебесі;

– еңбек қауіпсіздігі және қызметкерлердің әлеуметтік кепілдіктері;

– жұмыс беруші мен жұмыскер арасындағы өзара қатынасты құқықтық реттеу мәселелері кеңінен түсіндірілді.

Семинар барысында еңбек заңнамасына енгізілген өзгерістердің практикалық маңызы ерекше талқыланды. Қатысушылар жұмысқа қабылдау, еңбек шартын өзгерту немесе тоқтату, еңбек демалысы, жұмыс уақыты мен демалыс уақытына қатысты нақты мысалдар негізінде түсіндірмелер алды.

Сонымен бірге, еңбек дауларын болдырмау және оларды тиімді реттеу тетіктері бойынша тәжірибелік кейстер қарастырылды. Мамандар ұжымдық келіссөз жүргізу, медиация құралдарын пайдалану және әлеуметтік әріптестік механизмдерінің тиімділігін арттыру жөнінде пікір алмасты.

Майра Боранбаева өз сөзінде кәсіподақ ұйымдарының қызметі тек құқық қорғаумен шектелмейтінін атап өтті.

– Кәсіподақ – еңбек адамының сенімді қорғаны ғана емес, сонымен қатар ұжымдағы тұрақтылық пен өзара түсіністікті қалыптастыратын маңызды институт. Сондықтан кәсіподақ көшбасшылары заңнаманы жетік меңгеріп, кез келген еңбек дауына құқықтық тұрғыда сауатты әрекет ете білуі қажет, – деді ол.

Оқу үдерісі интерактивті форматта ұйымдастырылды. Қатысушылар топтық жұмыстарға бөлініп, түрлі тәжірибелік тапсырмалар орындады. Сондай-ақ нақты еңбек даулары бойынша модельдік жағдайлар қарастырылып, оларды шешудің жолдары талқыланды.

Мұндай тәсіл теориялық білімді тәжірибемен ұштастыруға мүмкіндік беріп, қатысушылардың құқықтық мәселелерді шешу дағдыларын жетілдіруге ықпал етті. Әсіресе кадр қызметкерлері мен бастауыш кәсіподақ ұйымдарының жетекшілері үшін семинардың тәжірибелік маңызы жоғары болды.

Шара барысында еңбек ұжымдарындағы әлеуметтік ахуал, жұмысшылардың құқықтарын қорғау, еңбек қауіпсіздігін сақтау және ұжымдық шарттардың орындалуы мәселелері де кеңінен сөз болды.

Қатысушылар қазіргі таңда еңбек саласында кездесетін негізгі проблемаларға тоқталып, оларды шешу бойынша ұсыныстарын жеткізді. Атап айтқанда, еңбек дауларының алдын алу мақсатында құқықтық түсіндіру жұмыстарын күшейту, жастарды кәсіподақ қызметіне тарту және цифрлық технологияларды кеңінен енгізу қажеттігі айтылды.

Семинар соңында қатысушылар өзара пікір алмасып, ұйымдастырылған оқыту шарасының маңыздылығын атап өтті. Олар мұндай семинарлар кәсіподақ белсенділерінің кәсіби біліктілігін арттырып қана қоймай, еңбек қатынастары саласындағы құқықтық мәдениетті нығайтуға ықпал ететінін жеткізді.

Сонымен қатар, қатысушылар кәсіподақ ұйымдарының қоғамдағы рөлін арттыру, еңбек ұжымдарындағы тұрақтылықты сақтау және қызметкерлердің әлеуметтік құқықтарын қорғау бағытындағы жұмыстарды одан әрі жетілдіру қажеттігін айтты.

Жалпы, оқу семинары кәсіподақ мүшелерінің құқықтық сауаттылығын арттырып, еңбек заңнамасындағы өзгерістерді түсіндіруге, әлеуметтік әріптестікті дамытуға және кәсіподақ қызметінің тиімділігін арттыруға бағытталған маңызды алаң болды.

Іс-шара қорытындысында ұйымдастырушылар алдағы уақытта да осындай тәжірибелік семинарлар мен оқыту бағдарламалары жалғасатынын атап өтті.

Фото: Қызылорда облыстық мәдениет, спорт, туризм және ақпарат салалық кәсіподағы