ҚЫЗЫЛОРДАДА ШОМЫЛУ МАУСЫМЫНА ДАЙЫНДЫҚ КҮШЕЙТІЛДІ

Кеше, 14:00

1 506

Қызылорда облысының Өңірлік коммуникациялар қызметінде өткен баспасөз конференциясында өңірдегі су айдындарындағы қауіпсіздік шаралары, шомылу маусымына дайындық барысы және сүңгуір-құтқару қызметінің жұмысы жан-жақты баяндалды. Жиын барысында жаз мезгілінде тұрғындардың қауіпсіз демалуын қамтамасыз ету, судағы жазатайым оқиғалардың алдын алу және құтқару қызметінің дайындығы туралы кеңінен айтылды.

Брифингке облыстық Төтенше жағдайлар департаментінің өкілдері, құтқару қызметінің мамандары, жергілікті атқарушы органдардың жауапты тұлғалары және бұқаралық ақпарат құралдарының өкілдері қатысты. Шараның негізгі мақсаты – тұрғындарға судағы қауіпсіздік ережелерін түсіндіру және алдын алу жұмыстарын күшейту.

Баспасөз конференциясы барысында облыстық Төтенше жағдайлар департаменті Жедел-құтқару жасағының басшысы Бақтияр Тұрманов салада атқарылып жатқан жұмыстар мен алдағы міндеттерге тоқталды. Ол су айдындарында қауіпсіздікті қамтамасыз ету – басты міндеттердің бірі екенін атап өтті.

– Облыстық ТЖД Жедел-құтқару жасағында 75 қызметкер жұмыс істейді, оның 55-і – сүңгуір мамандар. Сүңгуір-құтқарушылар тәулік бойы үздіксіз қызмет атқарады және кез келген жағдайда жедел әрекет етуге дайын. Басты мақсатымыз – су айдындарында қауіпсіздікті қамтамасыз ету және тұрғындар арасында алдын алу жұмыстарын күшейту, – деді ол.

Маманның айтуынша, құтқару қызметі тек төтенше жағдайларға әрекет етумен шектелмей, алдын алу бағытындағы жұмыстарды да тұрақты түрде жүргізеді. Осы мақсатта мектептерде, жазғы демалыс лагерьлерінде және халық көп жиналатын орындарда түсіндіру шаралары ұйымдастырылуда.

Су айдындарындағы қауіпсіздікті арттыру үшін арнайы ақпараттық науқандар қолға алынған. Тұрғындарға судағы қауіпсіздік ережелері түсіндіріліп, жадынамалар таратылуда. Сонымен қатар, балалар мен жасөспірімдер арасында судағы тәртіп мәдениетін қалыптастыруға ерекше назар аударылуда.

Шомылу маусымы кезінде белгіленген жағажайларда барлық қажетті жағдайлар жасалып, қауіпсіздік талаптары қатаң сақталады. Құтқарушылар арнайы бақылау мұнараларында кезекшілік атқарып, демалушылардың қауіпсіздігін тұрақты бақылауда ұстайды.

Сонымен қатар қауіпті аймақтарда ескерту белгілері орнатылып, суға түсуге тыйым салынған жерлер анық көрсетілген. Мұндай аумақтарда мобильді бақылау бекеттері жұмыс істеп, рейдтік шаралар тұрақты түрде жүргізілуде.

Құтқару қызметі заманауи құрал-жабдықтармен толық қамтамасыз етілген. Атап айтқанда, сүңгуір жабдықтары, жүзу құралдары, байланыс жүйелері және жедел әрекет ету техникалары жаңартылған. Бұл кез келген төтенше жағдайға жедел әрі тиімді әрекет етуге мүмкіндік береді.

Бақтияр Маханбетжанұлының айтуынша, құтқарушылардың кәсіби біліктілігін арттыру мақсатында тұрақты оқу-жаттығу жиындары өткізіліп тұрады. Онда судағы іздестіру-құтқару операциялары, алғашқы медициналық көмек көрсету және төтенше жағдайларда әрекет ету тәсілдері пысықталады.

Спикердің айтуынша, биыл өңірде ресми түрде белгіленген 7 жағажай халық игілігіне қызмет етеді. Бұл орындарда демалушылар үшін қауіпсіз әрі қолайлы жағдайлар қарастырылған. Әр жағажайда құтқарушылар кезекшілік атқарып, медициналық көмек көрсету пункттері жұмыс істейді.

Сонымен қатар, жағажай аумақтары толық абаттандырылып, санитарлық талаптарға сай жабдықталған. Демалушыларға арналған көлеңке орындары, киім ауыстыратын бөлмелер, ақпараттық стендтер және қауіпсіздік белгілері орнатылған.

Жиын барысында мамандар тұрғындарды судағы қауіпсіздік ережелерін қатаң сақтауға шақырды. Әсіресе балаларды қараусыз қалдырмау, тыйым салынған жерлерде шомылмау және мас күйде суға түспеу қажеттігі ерекше атап өтілді.

Төтенше жағдайлар қызметі өкілдері жазғы кезеңде рейдтік шаралар күшейтілетінін жеткізді. Су айдындарында полиция, жергілікті атқарушы органдар және құтқару қызметі бірлесіп жұмыс істейтін болады.

Сондай-ақ тұрғындар тарапынан түсетін өтініштер мен хабарламаларға жедел әрекет ету үшін 112 бірыңғай диспетчерлік қызметі тәулік бойы жұмыс істейді. Бұл жүйе арқылы кез келген төтенше жағдай туралы ақпарат жедел түрде тиісті қызметтерге жеткізіледі.

Қорытындылай келе, мамандар шомылу маусымының қауіпсіз өтуі тек құтқару қызметіне ғана емес, әрбір азаматтың жауапкершілігіне де байланысты екенін атап өтті. Тұрғындар қарапайым қауіпсіздік ережелерін сақтаған жағдайда жаз мезгілін қауіпсіз әрі жайлы өткізуге мүмкіндік бар.

Қызылорда облысында шомылу маусымына дайындық жұмыстары жалғасуда және барлық тиісті қызметтер күшейтілген режимде жұмыс істеуге дайын екені айтылды.