ҚЫЗЫЛОРДАДАҒЫ ЖЕКЕ МЕКТЕП МҰҒАЛІМДЕРІ ӘДІЛДІК ІЗДЕЙДІ

Кеше, 17:00

2 613

Қызылорда қаласындағы ірі жеке білім беру мекемелерінің бірі – «Orda School» мектебінің мұғалімдері тарапынан еңбек заңнамасы талаптарының сақталмауына қатысты шағым түсті. Қала бойынша 3 мектебі және онда 190-ға жуық мұғалімі бар білім ұясының ұстаздары еңбек демалысы ақысының уақытылы төленбегеніне және жалақының кешіктірілуіне наразы, – деп хабарлайды Opennews.kz ақпараттық агенттігі.

Әлеуметтік желіде жариялаған Акылбек Ибраевтың жазбасында мұғалімдер ағымдағы жылдың 1 маусымынан бастап жыл сайынғы ақылы еңбек демалысына шыққандарын, алайда заң бойынша тиесілі қаражатты әлі күнге дейін ала алмай отырғандарын алға тартады.

«Мектеп әкімшілігі демалыс ақысының қашан төленетіні туралы нақты мерзімді айтпай отыр. Бұдан бөлек, 2026 жылдың бойында жалақыны кешіктіру жағдайлары бірнеше рет қайталанды. Тіпті 2025 жылдың желтоқсан айында айлығымыздың 15 пайызы ұсталып, оны қаңтарда қайтарамыз деген уәде орындалған жоқ. "Педагог мәртебесі туралы" Заң талаптарына сай, мұғалімдерге берілуі тиіс сауықтыру жәрдемақысы да мектеп ашылғалы бері төленбеген», – дейді шағым түсірген ұстаздар қауымы.

Мұғалімдердің айтуынша, мамыр айында өткен педагогикалық кеңесте мектеп басшылығы қаржылық қиындықтарды алға тартқан. Нақтырақ айтқанда, 100-ге жуық оқушының ата-анасы оқу ақысын уақытылы төлемегені және жеке мектептерге құрылыс нысандары үшін берілетін мемлекеттік төлемнің 8 жылдан кейін тоқтатылуы себеп ретінде көрсетілген. Шағымданушылар бұл жағдайдың өздерінің әлеуметтік жағдайына кері әсер етіп, несие төлемдері мен емделу шараларының кешігуіне әкеліп соққанын айтып, ҚР Оқу-ағарту министрлігі мен тиісті органдардан еңбек құқықтарының қорғалуын сұрайды.

Мектеп басшылығының жауабы: «Қаржылай міндеттемелер толық орындалады»

Туындаған мәселеге байланысты біз «Orda School» мектебінің директоры Рауаш Алиеваға хабарласып, жағдайдың мән-жайын білдік. Мектеп басшысы айтылған уәждерге қатысты өз түсініктемесін беріп, мұғалімдердің құқығы шектелмейтінін жеткізді.

Мектеп директорының мәліметінше, қазіргі таңда қызметкерлер мамыр айының жалақысын толық көлемде алған. Сонымен қатар, маусым айының айлығын төлеу процесі басталып кеткен, ал шілде айының 20-сына дейін келесі айдың да жалақысы аударылмақ. Рауаш Алиеваның түсіндіруінше, дәл осы екі айдың жалақысы қызметкерлердің еңбек демалысының ақысы ретінде есептеледі.

«Мемлекет жеке мектептерді жылына тек 9 ай ғана қаржыландырады. Қалған демалыс уақытындағы қызметкерлердің ақысын мектеп құрылтайшысы өз есебінен өтейді. Осы уақытқа дейін, яғни мектеп құрылғалы бері 8 жылдан астам уақыт ішінде еңбек демалысы ақысын төлеу ешқашан тоқтаған емес және алдағы уақытта да тоқтамайды. Барлық төлемдер кезең-кезеңімен беріледі», – деп мәлімдеді мектеп директоры.

Қазақстан Республикасының Еңбек кодексіне сәйкес, жыл сайынғы ақылы еңбек демалысының ақысы демалыс басталудан күнтізбелік 3 күннен кешіктірілмей төленуі тиіс. Егер еңбек демалысы жұмыс уақытының графигінен тыс берілсе, төлем ол басталған күннен бастап 3 жұмыс күнінен кешіктірілмей жасалуы керек. Осы ретте жеке білім беру ұйымдарының ішкі қаржыландыру тетіктері мен мемлекеттік тапсырыс ерекшеліктері еңбек заңнамасының жалпы талаптарын айналып өтуге негіз бола алмайды.

Қазіргі уақытта тараптардың уәждері әртүрлі. Мұғалімдер төлемдердің заңды мерзімінде берілмеуін және ақпараттың кеш ескертілуін айыптаса, мектеп әкімшілігі ішкі есеп айырысу ерекшеліктеріне байланысты қаржының кезең-кезеңімен толық төленетініне кепілдік беріп отыр.