ШИЕЛІ АУДАНЫНДА МАЛ ІШЕТІН СУ ЖОҚ

 Шиелі ауданындағы үш ауылдың тұрғындары мал суара алмай отыр. Ал жауапты мекеме суды желтоқсанда беруді жоспарлаған. Бұл туралы Opennews.kz ақпараттық агенттігі khabar.kz сайтына сілтеме жасап хабарлайды. 

 Қызылорда облысының Шиелі ауданындағы Нартай, Жиделіарық және Алғабас ауылдарының тұрғындары мал суаратын су таппай отыр. Қыркүйекте «Жаңа Шиелі» магистральдық каналы жабылғаннан кейін ішкі су арналары да құрғаған. Тұрғындардың айтуынша, бұл мәселе соңғы екі жылдан бері қайталанып келеді.

 Жиделіарық ауылының тұрғыны Мырзабек Исаевтың сөзінше, су тапшылығынан мал өрістен ауып, су бар жерді жағалауға мәжбүр. Мәселе мұнымен бітпейді. Ауылдағы мал суарылатын құдықтың да су деңгейі төмендеп барады. Жиделіарық ауылының тұрғыны Әлімхан Әшіров су арналарының құрғап тартылып, айналасының бәрі батпаққа айналғанын, малдың батып жатқанын айтып ашынады.

 «Қазсушар» филиалы директорының орынбасары Айдос Асанбаевтың түсіндіруінше, магистральдық каналдың табанына бетон құю және су өлшейтін цифрлық қондырғылар орнату жұмыстарына байланысты су беру уақытша тоқтатылған. Жұмыс аяқталған соң суды желтоқсан айында қайта беру жоспарланып отыр.

 Канал жөндеу мен суды есепке алу жүйесін жаңарту қажет-ақ. Бірақ жұмыс жоспары дайын болғанымен, мал суаратын судың мәселесі шешілген жоқ. Екі жыл қатарынан қайталанған су тапшылығы неге алдын ала ескерілмеді? Арна жабылған кезде ауыл тұрғындарына балама су көзі қарастырылды ма? Желтоқсанға дейін малын суара алмай отырған шаруалардың шығынын кім есептейді?

 Мекеме магистральдық канал бойындағы сегіз бекетке су өлшейтін қондырғы орнатып, келесі егін науқанына дейін 100 шақырымға жуық арнаны тазалауды жоспарлап отыр. Алайда бұл жұмыстардың нәтижесі кейін көрінеді, ал ауылдағы су тапшылығы қазір болып жатыр.

 Су – ауыл тіршілігінің күретамыры. Каналға бетон құюға болады, цифрлық құрылғы орнатуға да болады. Бірақ сол жұмыстардың арасында ауылдың күнкөрісі ескерусіз қалмауы керек.