Роза Әлқожа аза тұту күніне байланысты концертін кейінге шегерді
Отандық әнші Роза Әлқожа қайғылы қазаға байланысты елордадағы кешін кейінге шегерді, - деп хабарлайды "Opennews.kz" ақпарат агенттігі.
"Қаза қайырлы болсын. Абай облысына қайғырып көңіл айтамыз! Тосыннан келген қазаға байланысты бүгін Астанада кешіміз болмайтынын ескертеміз", - деп жазды Роза Әлқожа Instagram парақшасында.
Айта кетейік, осыған дейін елімізге танымал тұлғалар да Абай облысындағы өртке қатысты алаңдаушылық білдірген болатын.
Естеріңізге сала кетейік, Абай облысында 8 маусым күні Батпаев орман шаруашылығының аумағында ағаштар өртенді. Бастапқыда өрт 0,3 гектар аумақты шарпыған.
9 маусымда Абай ауданындағы табиғи өртті сөндіру жөніндегі штаб өртті сөндіруге қатысқан "Семей орманы" резерватының 14 орман шаруашылығы қызметкерінің байланысын тоқтатқанын хабарлады. Сол күні із-түзсіз жоғалған үш орманшының қаза тапқаны хабарланып, 11 адамды іздеу жұмыстары жалғасты.
Ал маусымның 10-ы күні кешке із-түзсіз жоғалған орман шаруашылығының қалған 11 қызметкерінің өлі күйінде табылғаны белгілі болды.
