ҚАРА ӨЛЕҢДІ ҚҰЛАГЕРДЕЙ ҚУАТТАҒАН АҚЫН ӘСКЕРБЕК РАХЫМБЕКҰЛЫН ЕСКЕ АЛУ ШАРАСЫ ӨТТІ

Бүгін А.Тоқмағанбетов атындағы мәдениет үйінде облыстық қоғамдық даму басқармасының ұйымдастыруымен Қазақстан Жазушылар Одағының мүшесі, ақын Әскербек Рахымбекұлының 80 жылдығына орай «Қара өлеңнің құлагері» атты еске алу шарасы өтті,-деп хабарлайды Opennews.kz ақпарат агенттігі.

Аймақ басшысының тапсырмасымен ұйымдастырылған жиынға облыстың зиялы қауым өкілдері, бұқаралық ақпарат құралдары және ақынның туған-туыстары мен жақындары қатысты.

Шарада Әскербек Рахымбекұлының бірге оқыған достары, замандастары, жазушы Махмұтбай Әміреұлы, ақын Қаршыға Есімсейітова, Зинабдин Шермұхамедұлы, Шәкизада Әбдікәрімов және Дүйсенбек Аяшұлы, жылы естеліктерімен бөлісті.

- Әсекең өте ақжарқын жан еді. Әрдайым өзінің артынан ерген іні-қарындастарына үлгі болып, жанындағыларға жылулық сыйлай білді. Осы қасиеті арқылы ортасында абыройлы болды. Бүгінгі еске алу кеші келер ұрпаққа қалатын ізгілікті іс. Қазақ поэзиясында Әскербектің есімі мәңгі өшпейді,- деді Махмұтбай Әміреұлы.

«- Табиғат тазару үшін жаңбыр керек,

Ал адам рухани тазаруы үшін ақын керек...

Бүгінгі кеште Әс-Ағаның жыр шумақтарын қайта еске түсірдік. Ол - әдебиетке ғана емес, Сыр мәдениетіне де үлкен үлес қосқан тұлға. Әскербек Рахымбекұлы - сөз құдыретін биікке көтерген, әр сөзінің астарында ақиқат тұратын ақынның артында мол мұра қалды»,-деді Алашқа белгілі ақын, Ахмет Нишати атындағы халықаралық әдеби сыйлықтың иегері, Қазақстан Жазушылар және Журналистер Одағының мүшесі Шәкизада Әбдікәрімов.

Сондай-ақ, шарада облыстық Жастар театрының әртістері ақын өлеңдерін жатқа оқыса, А.Тоқмағанбетов атындағы қалалық мәдениет үйінің өнерпаздары Ә. Рахымбекұлының сөзіне жазылған әндерді әуелете шырқады.

Қасиетті топырақтан нәр алып, қазақ әдебиетінде өзіндік қолтаңбасын қалдырған Әскербек Рахымбекұлының есімі қазақ өлеңі тірі тұрғанда жасай бермек.