Мұнайшылар жалақыларын көтеруді талап етіп, далада түнеуде
269
Маңғыстауда "Phystech II" компаниясының жұмысшылары жалақы көтеруді талап етіп, далада түнеп шықты, деп хабарлайды Opennews.kz ақпарат агенттігі.
Маңғыстау облысы Түпқараған ауданының Солтүстік Қаражанбас кен орнында жұмыс істейтін Phystech 2 компаниясының жұмысшылары жалақыларын көтеруді талап етіп, үш күннен бері наразылыққа шығып тұр. Отызға тарта мұнайшы жалақыларын жүз пайыз көбейтуді, жұмысшылар талабы ескерілген ұжымдық шарт қабылдауды талап етеді.
13 желтоқсанға қараған түні вахта ауысымынан шыққан мұнайшылар үйіне қайтпай, компания кеңсесінің алдына киіз үй тіккен. Олардың бірі Азаттыққа ондаған мұнайшының киіз үй маңында тұрғанын көрсететін видео жіберді.
12 градус аязда компания басшылығы нысан аумағынан қуып шықты. Мәселе шешілгенін далада күтіп жүрміз,- дейді видео авторы.
Тағы бір жұмысшы наразылықты полиция бақылап кеткенін хабарлады.
Бұған дейін, 10 желтоқсанда мұнайшылар Қазақстан президенті Қасым-Жомарт Тоқаев пен бірнеше шенеуніктің атын атап, үндеу жариялаған.
Жалақымызды 100 пайызға көтеруді талап еткенбіз. Қазіргі жалақымыз 112-180 мың теңге аралығында. Бітім комиссиясы құрылғанымен талабымыз орындалмады. Одан кейінгі төрелік комиссияда да шеше алмады. Жалақымызды небәрі 15 пайыз көтереміз деп, әлеуметтік шиеленіске итермелеп отыр,- дейді жұмысшының бірі. Оның сөзін артында тұрған ондаған жұмысшы қостаған.
Phystech 2 компаниясында вахта режимімен 110 мұнайшы жұмыс істейді. Компания заңгері Дариға Қибасованың сөзінше, қазір отызға тарта жұмысшы наразылық білдіріп тұр.
Әзірге жұмыс тоқтаған жоқ. Бірақ жаңа ауысымдағы 55 мұнайшы да наразылыққа қосылатынын айтты, - деді.
Қибасованың сөзінше, наразылыққа шыққан мұнайшылардың "орташа жалақылары - 200-230 мың теңге".
Мекеме қолынан келетін нәрсенің бәрін істеді. Жалақыларын 100 пайыз көбейте алмайды. Біз банкрот алдында тұрған компаниямыз,- дейді ол.
Phystech 2 компаниясы мұнай және ілеспе газ өндірумен айналысады. 2015 жылы 150-ге тарта жұмысшысы бар мекеме ретінде тіркелген. Биыл компания 2,3 миллиард теңге салық төлеген.
Жұмысшылар жіберген видеода компания директоры Ернар Байжалиевтің мұнайшылармен кездескен сәті бар. Екі тарап дауласып жатқан тұста Байжалиев "нысан ерекше қауіпті саналатынын, жұмысшылар наразылығы заңсыз" екенін айтқан.
Мұнайшының бірі мекеме әкімшілігіне наразылыққа шығатыны туралы алдын ала ескерту жіберілгенін, мәселені шешуге бес күн бергенін хабарлады. Ескерту келгенін видеода компания директоры да растаған.
Жұмысшылар талаптары орындалмайынша далада түней беруге дайын. Ұжымның жаппай наразылық шарасы 15 желтоқсанда өтетінін ескертті.
Қызметкерлердің видео үндеуі әлеуметтік желілерге тарап кетті. Оқиға орнына келген басшы құрам:
Ереуіл ұйымдастыруға хабарлама беріп, 88 адам наразылыққа шығады дегенді білеміз. Бірақ бұл әрекеттерің заңсыз. Еңбек кодексінің 156 бабы, 1-бөлігінде аса қауіпті аумақта ереуіл ұйымдастыруға болмайды. Кезекшілікпен жұмыс істеген күнде де заңсыз болып табылады,- деп жауап берді.
