Оқушыға берілетін әлеуметтік көмек ата-аналардың шотына аударылды
Оқу-ағарту вице-министрі Еділ Оспан жалпыға бірдей міндетті білім қорынан 450 мыңнан астам мұқтаж оқушыға мектеп формасы мен оқу-құралдарын сатып алуға 18 млрд теңгеден астам қаражат бөлінгенін мәлімдеді, - деп хабарлайды "Opennews.kz" ақпарат агенттігі.
Вице-министрдің айтуынша, атаулы әлеуметтік көмек ата-ана қамқорлығынан айырылған, жетім балалар мен жан басына шаққанда табысы ең төменгі күнкөріс деңгейінен аз және әлеуметтік көмекке құқылы отбасыларға беріледі. Сондай-ақ, төтенше жағдай салдарынан жәрдемді талап ететін отбасылардан шыққан балалар қаржылай көмек ала алады. Абай облысындағы өрт салдарынан қаза тапқандардың балаларының әрқайсысына 500 мың теңге көлемінде материалдық жәрдем көрсетілген.
Оқу-ағарту министрлігі әрбір білім алушыға киім, оқу-құралдарын сатып алуға арналған қаражаттың ең төменгі мөлшерін бекітті.
Биыл әрбір білім алушыға берілетін материалдық көмектің ең төменгі мөлшері 40 567 теңгені құрайды. Былтыр Оқу-ағарту министрлігі көп балалы, аз қамтылған аналардың талаптарын естіп, өтініштерін орындау мақсатында есепшоттарына қаражат аударуды көздейтін Үкіметтің қаулысына өзгеріс енгізді. Қабылданған өзгерістер ата-аналар мен балаларға мектеп формасын, аяқ киімді, кеңсе тауарларын, әрі жеткізушілерді өз бетінше таңдауға мүмкіндік береді, - деп атап өтті Еділ Оспан.
Осылайша, 3 тамызындағы жағдай бойынша өңірлерде 201 206 баланың ата-анасының есепшотына 8,2 млрд теңгеден астам қаражат аударды. Мұндай жағдайда ата-аналар аталған тауарларды сатып алғаннан кейін оны растайтын құжатты ұсынуы керек. Материалдық көмек тамыздың соңына дейін ата-аналардың мектеп директорының атына берген өтініші негізінде ұсынылады.
Айта кетейік, биыл жаңа оқу жылында республика бойынша мектептерде білім алушылардың саны 3 млн 500 мың, оның ішінде бірінші сыныпқа қабылданған балалар саны 380 000 мыңнан асады.
