Кәсіпкерлікпен айналысқан әкімнің орынбасарына айыппұл салынды
Сыбайлас жемқорлыққа қарсы қызметтің Маңғыстау облысы бойынша департаментінің басшысы Шамұрайт Шәменов Ақтау қаласы әкімінің орынбасары кәсіпкерлікпен айналысқаны үшін 483 мың теңге айыппұл салынғанын мәлімдеді, - деп хабарлайды "Opennews.kz" ақпарат агенттігі.
"Ағымдағы жылдың басынан бері департамент 30 әкімшілік хаттама жасады. Олардың қаралу қорытындысы бойынша бюджетке 10 млн теңге көлемінде айыппұл төленді», - деді департамент басшысы Шамұрайт Шәменов.
Ақтау қаласы әкімінің орынбасары қолданыстағы шектеулер туралы біле тұра, кәсіпкерлікпен айналысқан. Ол әкімшілік құқық бұзушылық туралы кодекстің 154-бабының (Қазақстан Республикасының заңнамасымен белгіленген тұлғаның кәсіпкерлік қызметпен айналысуы) талаптарын бұза отырып, жүзеге асырған. Сондықтан оған 483 мың теңге көлемінде айыппұл салынған.
