Сыр өңіріне 1,4 трлн теңге инвестиция тартылды – Нәлібаев

Қызылорда облысының әкімі Нұрлыбек Нәлібаев орталық коммуникациялар қызметіндегі брифингте облысқа тартылған инвестиция жайлы айтты, - деп хабарлайды "Opennews.kz" ақпарат агенттігі.

Мемлекет басшысының Қазақстан халқына арнаған Жолдауынан туындайтын негізгі міндеттердің бірі – отандық және шетелдік инвестицияларды тарту. Биыл жоспарланған 517,5 млрд теңге меженің 478,3 млрд теңгесіне 10 айда қол  жеткізілді. Соңғы үш жылда 30,3 млрд.теңгенің 35 инвестициялық жобасы іске қосылды. 

Қызылорда облысына 1,4 триллион теңге көлемінде инвестиция тартылды. Бұл облыстың экономикалық дамуында үлкен жетістік болып табылады және аймақтың барлық салаларына, әсіресе индустриялық өндіріс, ауыл шаруашылығы, энергетика және инфрақұрылымдық жобаларға оң әсерін тигізеді.

Қызылорда көрсеткіштің өсу қарқыны, жоспарлы көрсеткіштің орындалуы бойынша өңірлер арасында І орынға шықты. Өнеркәсіп саласының дамуына серпін берген шыны зауыты арқылы өндіріске 42 млрд. теңге инвестиция тартылды. Қажетті шикізаттар шетелден, әсіресе Ресейден, Өзбекстаннан тасымалдануда. Зауыт іске қосылғаннан бері 37,1 млрд. теңгенің 28,7 млн. шаршы метр шынысын өндіді. Өнімнің 70%-ы ішкі нарыққа, 30%-ы Өзбекстан, Қырғызстан, Тәжікстан, Грузияға және Ресейге экспортқа жіберіледі. Қазіргі таңда зауытта 400-ге жуық адам жұмыс жасауда. 

Инвестиция тарту, өндірістік кооперацияны дамыту, жаңа жобаларды іске асыру үшін шетелдік компания басшылары, дипломатия өкілдері облысқа жұмыс сапарымен келіп, кездесулер ұйымдастыруда. Аймақта инвесторларға қолайлы климат қалыптасты деп айтуға толық негіз бар.

Сыр өңірінде жүзеге асырылған ірі инвестициялық жобалар қатарында «Болат Өтемұратов қорының» демеушілігімен салынған «Қорқыт ата әуежайының» жаңа терминалы бар. «Акса Энерджи» түрік компаниясының  инвестициясына қуаттылығы 240 мегаваттық жаңа жылу-электр орталығының құрылысы қарқынды жүруде.

Қызылорда облысында өнеркәсіптік секторды дамытуға бағытталған жобалар қарқынды түрде жүзеге асырылуда. Мысалы, мұнай және газ саласы, металлургия, химия және құрылыс материалдары өндірісі сияқты стратегиялық маңызды салаларға инвестициялар тартылды. Инвестициялар жаңа өндіріс орындарын құруға, сондай-ақ инфрақұрылымдық жобаларды жүзеге асыруға мүмкіндік береді. Бұл өз кезегінде жаңа жұмыс орындарын ашып, жұмыссыздық деңгейін төмендетуге ықпал етеді. 

Энергетика саласындағы жаңартылатын энергия көздеріне жасалған инвестициялар аймақтың экологиялық жағдайын жақсартуға және экологиялық таза өндірістердің дамуына негіз болады.

Бұл инвестицияларды тарту Қызылорда облысының экономикалық дамуына үлкен серпін береді және аймақтың болашақтағы орнықты дамуын қамтамасыз етеді.