Мал ұрлығымен айналысқандар сотталды
1 340
Бас прокуратура Жамбыл облысында мал ұрлықшылары сотталғанын мәлімдеді, - деп хабарлайды "Opennews.kz" ақпарат агенттігі.
2024 жылдың қазан айынан бастап Тұрар Рысқұлов ауданының полиция бөлімшесіне ауыл тұрғындарынан үй жануарларының ұрлануы бойынша арыздар түскен. Осылайша мал ұрлығы фактісімен 5 сотқа дейінгі тергеп-тексеру істері басталған.
"Жедел-іздестіру іс шараларының нәтижесінде 4 күдікті анықталып, барлығы Луговой ауылының тұрғындары болып шықты. Сотқа дейінгі тергеп-тексеру барысында аталған тұлғалар алдын ала сөз байласу арқылы түнгі уақытта өздерінің басқаруындағы жеңіл автокөліктерімен шығып, ауылдардың айналасында жайылып жүрген жылқы және сиыр малдарын ұстау арқылы сойып, етке өткізумен айналысқандығы анықталған. 13 бас үй жануарлары ұрланып, жәбірленушілерге 4,6 млн теңгеге материалдық шығын келтірілген", - деп хабарлады Бас прокуратура.
Аудандық соттың үкімімен төрт сотталушы кінәлі деп танылып, 5 жыл мерзімге бас бостандығынан айыру түріндегі жазасы тағайындалды.
Осы тектес 2024 жылдың қыркүйек және қараша айларында залал көлемі 7 млн теңгені құрайтын 17 бас мал ұрлығының екі фактісі әшкереленген. Екі айыпталушы 3 жыл 6 ай және 5 жыл мерзімге бас бостандығынан айыру түріндегі жазаларына сотталды.
Сот үкімдері заңды күшіне енбеген.
