ТАЗАЛЫҚ – ТАБИҒАТҚА ДЕГЕН ТАҒЗЫМ

Шиелі өңірі тағы да жаңарып, тазалық пен тәртіптің жарқын үлгісін көрсетті, - деп хабарлайды "Opennews.kz" ақпарат агенттігі.

 «Таза Қазақстан» экологиялық акциясы аясында өткен кезекті сенбілік – жай ғана санитарлық шара емес, бұл туған жерге деген сүйіспеншілік пен азаматтық жауапкершіліктің көрінісі болды.

Аудан тұрғындары, мекеме қызметкерлері мен жастар – барлығы бір мақсатқа жұмылып, туған өлкенің көркі мен тазалығына үлес қосуға белсене қатысты. Қолдарына күрек, тырма, қап ұстаған еріктілер көшелерді, арық-атыздарды, демалыс орындарын күл-қоқыстан тазартып, айналаны абаттандыруға білек сыбана кірісті. Арам шөп жұлынып, қураған бұтақтар кесілді, жаяу жүргіншілер жолы сыпырылып, жиналған қоқыс арнайы орындарға жеткізілді. Сонымен қатар, рұқсатсыз төгілген қалдықтар жойылды.

Бұл шара – экологиялық мәдениеттің қалыптасып келе жатқанын, тұрғындардың табиғатқа деген жанашыр көзқарасын айқын дәлелдеді. Ауа, су, топырақ – тіршіліктің негізі. Олардың тазалығы – болашақ ұрпақтың денсаулығы мен өмір сапасының кепілі. Мұны терең түсінген шиеліліктер сенбілікке белсене атсалысып, туған жерге деген құрметін нақты ісімен көрсетті.

Тазалық – тек сыртқы тәртіптің белгісі емес, ол – ішкі мәдениет пен рухани кемелдіктің көрінісі. Халқымыздың «Тазалық – имандылықтың жартысы» деген нақылы осыны меңзейді. Ауыл-аймақтың тазалығы артқан сайын тұрғындардың тұрмыс сапасы мен елге деген сүйіспеншілігі де арта түсетіні сөзсіз.

Шиеліде өткен сенбілік осының жарқын мысалына айналды. «Жұмыла көтерген жүк жеңіл» дегендей, жұртшылық бірлесе атқарған әр іс – табиғатқа жанашырлықтың, қоғам алдындағы жауапкершіліктің белгісі болды. Табиғатты аялау – тек маусымдық іс-шара емес, ол әр азаматтың күнделікті өмір салтына айналуы қажет.

Бүгінгі атқарылған тазалық – ертеңгі жарқын болашақтың кепілі. Ендеше, әрбір тұрғын туған жерінің көркеюіне, табиғи келбетінің сақталуына өз үлесін қосуды ұмытпасын!