Жоғалған ерлі-зайыптылардың әйелі зорланған, күйеуі асылулы күйде табылды

Ақтөбеде бір күн бұрын із-түзсіз жоғалып кеткен ерлі-зайыпты – 40 жастағы Аманжол Алмағанбетов пен оның әйелі Гүлжахан Шектібаеваның денесі қала шетінен табылды,-деп хабарлайды Opennews.kz ақпарат агенттігі.

Марқұм әйелдің денесінен зорлық белгілері анықталған. Ал оның күйеуі асылған күйінде табылған. Полиция дерегінше, ерлі-зайыптылар 41-разъездегі үйлерінен белгісіз бағытқа кетіп, қайта оралмаған. Оларды іздеу жұмыстары кеше басталған.

Облыстық ПД баспасөз қызметі қайғылы оқиғаға қатысты қылмыстық іс қозғалғанын хабарлады.

«1986 жылы туған әйелдің зорлық белгілері бар денесі табылуына байланысты қылмыстық іс тіркелді. Кейінгі іс-шаралар барысында оның күйеуі асылып тұрған күйінде анықталды. Қазір оқиға орнында жедел тергеу тобы жұмыс істеп жатыр. Аумақ тексеріліп, заттай дәлелдемелер жиналуда. Тиісті сот-медициналық сараптамалар тағайындалды», – делінген ведомство таратқан ақпаратта.

Қазіргі таңда тергеу амалдары жалғасып жатыр.