Ер адам әйелін ұрып-соғып, жақ сүйегін сындырды
Шымкент қаласының қылмыстық істер жөніндегі ауданаралық сотында азаматтық некедегі жұбайын соққыға жыққан ер адамның ісі қаралды,-деп хабарлайды Opennews.kz ақпарат агенттігі.
Қалалық соттың мәліметінше, оқиға өткен жылдың 1 мамырында Жаңаталап шағын ауданында болған. Кешкі уақытта жанжал барысында ер адам азаматтық некедегі жұбайының бетінен бірнеше рет ұрып, оның жақ сүйегін сындырған. Сараптама нәтижесінде жәбірленушінің денсаулығына орташа дәрежедегі зиян келтірілгені анықталған.
Сот материалдары бойынша, прокурор айыпталушыға 1 жыл бас бостандығынан айыру жазасын тағайындауды сұраған. Жәбірленуші де бас бостандығынан айыруды және азаматтық талап арызды қанағаттандыруды талап етті. Ал айыпталушы өз кінәсін ішінара мойындап, ақтауды сұрады.
Сот тараптарды тыңдай отырып, жауапкердің кінәсін ішінара мойындауын жеңілдететін мән-жай ретінде ескерді. Нәтижесінде айыпталушы ҚК-нің 107-бабы 3-бөлігі бойынша кінәлі деп танылып, 1 жыл мерзімге бас бостандығынан айырылды.
