Жол-көлік оқиғасы салдарынан 4 адам қаза тапты
Қостанай облысында жол апатынан 4 адам қаза тапты,- деп хабарлайды Opennews.kz ақпарат агенттігі Stan.kz сайтына сілтеме жасап.
Қостанай – Әулиекөл – Сұрған автожолының 106-шақырымында Mercedes пен ВАЗ маркалы автокөліктердің қатысуымен жантүршігерлік жол-көлік оқиғасы болды. Алдын ала мәліметтер бойынша, көліктер бетпе-бет соқтығысқан. Апат салдарынан төрт адам оқиға орнында қаза тапты. Сонымен қатар алты адам түрлі дәрежедегі жарақат алып, медициналық көмекке жүгінді. Олардың екеуі ауруханаға жатқызылып, дәрігерлердің бақылауында.
Құқық қорғау органдары аталған факті бойынша қылмыстық іс қозғады. Қазіргі уақытта жол апатының нақты себептері мен мән-жайы анықталып жатыр. Сараптамалар тағайындалып, оқиғаға қатысушылардың әрекеттеріне құқықтық баға берілетін болады.
“Алдын ала мәлімет бойынша, Mercedes-Benz 200 көлігінің жүргізушісі қарсы жолаққа шығып кеткен. Соның салдарынан ВАЗ автокөлігімен соқтығысқан”, – деп мәлімдеді ведомство.
Мамандар жол қозғалысына қатысушыларды қауіпсіздік ережелерін қатаң сақтауға, әсіресе жолда жылдамдықты шектен асырмауға және қарсы қозғалыс жолағына шықпауға шақырады.
