Колонияға Wi-Fi-роутер өткізген күдікті ұсталды
Абай облысы бойынша қылмыстық-атқару жүйесі департаментінің барынша жоғары қауіпсіздік мекемесінде сотталған адамға тыйым салынған затты жеткізу әрекеті тоқтатылды,- деп хабарлайды Opennews.kz ақпарат агенттігі Zakon.kz. сайтына сілтеме жасап.
Пошта жөнелтілімдерін рентген жабдығы арқылы тексеру барысында режим бөлімінің қызметкерлері күмәнді затты анықтады. Сәлемдемені ашу кезінде құрылғының киімнің ішіне жасырылғаны белгілі болды. Тексеру нәтижесінде екі антеннасы бар Wi-Fi роутер табылып, тәркіленді. Аталған сәлемдеменің ұрлық жасағаны үшін жаза өтеп жатқан 37 жастағы сотталған азаматқа арналғаны анықталды. Режим бөлімінің бастығы Нұрбек Рамазановтың айтуынша, мекемеде тыйым салынған заттарды өткізудің алдын алу мақсатында барлық сәлемдемелер мұқият тексеруден өтеді. Мұндай заңсыз әрекеттер дер кезінде анықталып, тиісті шаралар қабылданады. Қазіргі уақытта аталған дерек бойынша қосымша тексеру жұмыстары жүргізілуде.
"Қылмыстық-атқару жүйесі мекемелеріне тыйым салынған заттарды жеткізу әрекеттері қызметкерлердің үйлесімді жұмысы мен заманауи техникалық құралдардың арқасында жүйелі түрде тоқтатылуда. Бұл жағдайда да дер кезінде анықтау құрылғының сотталғанға жетуіне жол бермеді. Мұндай фактілердің барлығына құқықтық баға беріліп, кінәлі тұлғалар заңнамаға сәйкес жауапкершілікке тартылады", – деді ол.
