Шетел Қазақстанға электрондық түрде кіруге рұқсат алу үшін ақы төлейді
Президент Қасым-Жомарт Тоқаев цифрландыру, дербес деректерді қорғау, жол қозғалысы және озық көлік технологияларын реттеу мәселелеріне қатысты заңға қол қойды,- деп хабарлайды Opennews.kz ақпараттық агенттігі kt.kz_kaz сайтына сілтеме жасап.
Құжатта "Халықтың көші-қоны туралы" заңға енгізілетін өзгерістер де қамтылған. Заң шетел азаматтары үшін жаңа цифрлық тетіктерді енгізеді. Атап айтқанда, электрондық кіруге рұқсат, шетелдіктерге арналған цифрлық платформа, иммигранттардың бірыңғай дерекқоры және цифрлық иммигрант профилі іске қосылады.Шетел азаматтары цифрлық профиль қалыптастыру үшін жеке және биометриялық деректерді өңдеуді қоса алғанда, сәйкестендіру мен аутентификациядан өтеді.Электрондық елге кіру құжатына рұқсатты Ұлттық қауіпсіздік комитетінің келісімімен ішкі істер органдары береді. Құжатты рәсімдеу ақылы болады, ал төлем мөлшерін Үкімет белгілейді. Электрондық рұқсаттарды рәсімдеуден түскен қаражат цифрлық көші-қон жүйесін дамытуға, шекаралық бақылау инфрақұрылымын жаңғыртуға, сондай-ақ ішкі және келу туризмін дамыту жобаларына бағытталған. Заң ресми жарияланған күннен бастап 60 күннен кейін күшіне енеді. Бұған дейін, Қазақстанда шетелдіктердің QazETA қосымшасы арқылы көші-қон қызметтерін ала алатыны хабарланған.
