Аулада жеңіл көлік алты жасар баланы қағып, бала қаза тапты

Екібастұзда тұрғын үй ауласында жеңіл көлік алты жастағы баланы қағып, салдарынан бала қаза тапты. Оқиға 19 қыркүйек күні сағат 18:30 шамасында болған. Фактіні Павлодар облысының полиция департаменті растады, - деп хабарлайды Opennews.kz ақпарат агенттігі.

Полиция мәліметінше, бала өліміне әкеп соққан жол-көлік оқиғасы бойынша қылмыстық іс қозғалды. Қазір оқиғаның мән-жайы мен себептері анықталып жатыр.

Марқұм баланың туыстарының айтуынша, көлік тізгінінде қыз болған.

Олардың сөзінше, жүргізуші аулада орналасқан "жасанды жол кедергісіне" қарамастан, көлікті жоғары жылдамдықпен жүргізген. Мәліметтерге сенсек, көлік жүргізушісі ұсталған.

Полиция жол қозғалысына қатысушыларды жол ережесін және жылдамдық режимін қатаң сақтауға шақырды. Әсіресе тұрғын үй аулалары мен адам көп жүретін аумақтарда сақтық таныту қажет.