Жігітін пышақтап тастаған қыз 10 жылға сотталды

Шымкентте қызғаныштан жігітін пышақтап өлтірген 25 жастағы қыздың соты өтті, - деп хабарлайды Opennews.kz ақпарат агенттігі.

Соттың материалдарында жазылғандай, қайғылы оқиға 20 мамырда сағат 13:00 шамасында Самал-3 шағын ауданындағы үйдің ауласында болған. Қыз бен жігіттің арасында жанжал туып, әйел ас үйдегі пышақты ер адамның оң жақ кеудесіне сұғып алған. Жәбірленуші сол жерде көз жұмған. Сараптама нәтижесі көрсеткендей, әйел қылмысқа саналы түрде барған.

Шымкент қаласының қылмыстық істер жөніндегі мамандандырылған ауданаралық соты әйелге ҚК-нің 99-бабының 1-бөлігі, «Адам өлтіру, яғни басқа адамды құқыққа қарсы қасақана қазаға ұшырату» бабы бойынша айып тақты. Алқабилер соты оны кінәлі деп тапты.

Сот оны 10 жыл мерзімге бас бостандығынан айырды. Жазаны қылмыстық атқару жүйесінің орташа қауіпсіз мекемелерінде өтеу белгіленеді. Сондай-ақ жәбірленушілердің пайдасына 20 млн. теңге өндірілді.

Үкім заңды күшіне енген.