Елімізде сыртқы жарнамалар мен ұйымдардың атауы мемлекеттік тілде жазылуы қажет: Заң жобасы мақұлданды

6 қазан 2021, 15:16

474

Көрнекі ақпарат мәселелері бойынша өзгерістер мен толықтырулар енгізу туралы заң жобасы парламент мәжілісінің екінші оқылымында мақұлданды- деп хабарлайды Opennews.kz ақпарат агенттігі.

"Заң жобасының мақсаты – сыртқы жарнамалар мен әртүрлі маңдайшалардағы және көрнекі ақпараттардың мемлекеттік тілде дұрыс жазылуы және мәтіндердің түпнұсқалы аудармасы бойынша арнайы талаптарды тағайындау. Сайлаушылар жиі көтеретін тақырыптардың бірі – осы көрнекі ақпараттағы қазақ тіліндегі жазылатын мәтіннің сауатсыздығы, кейбір жағдайда тіпті қазақ тілінде мәтіннің болмауы. Осыған байланысты нақты талаптар енгізілді", – дейді депутат Берік Әбдіғалиұлы.

Заң жобасымен жұмыс жасау аясында депутаттар мынадай қызметтерді негізге алды:

әкімшілік-аумақтық бірліктердің, елді мекендердің құрамдас бөліктерінің, сондай-ақ басқа да географиялық объектілердің дәстүрлі тарихи қалыптасқан қазақ атауларын мемлекеттік тілде жазуға;

мемлекеттік емес ұйымдардың бланкілері мен маңдайшаларын мемлекеттік тілде, қажет болған кезде ғана орыс және (немесе) басқа да тілдерде жазуға;

жол белгілеріндегі жазбаны мемлекеттік тілде жазуға;

хабарландыруларды, жарнаманы, прейскуранттарды, баға көрсеткіштерін, ас мәзірін, нұсқағыштар мен басқа да көрнекі ақпаратты мемлекеттік тілде, қажет болған кезде орыс немесе басқа да тілдерде орналастыруға бағытталған түзетулер енгізді.