"Балағаттап, құл көреді". Жамбылдық тергеушілер бастықтарына қапалы
416
Жамбыл облысы бойынша экономикалық тергеу департаментінің бір топ қызметкерлерінің айтуларынша, соңғы уақытта ұжым ішінде алауыздық пайда болып, соның кесірінен мықты мамандар қызметтен кетіп жатқан көрінеді,- деп хабарлайды Opennews.kz ақпарат агенттігі Экспресс К сайтына сілтеме жасап.
Басшылар тіпті қылмыстық істер бойынша оң шешім шығару үшін күдіктілермен "келісуге" мәжбүрлейді екен.
Үш парақ қағазға жазылған шағымда 8 мәселе аталып көрсетілген. Алайда, шағымданушылар аты-жөндерін көрсетуден қашып отыр, себебі қудалаудан қорқады. Наразы топ департамент басшысының орынбасары Дәурен Мамытов пен тергеу басқармасы бастығының орынбасары Самат Исабековтердің іс-әрекеттерінен зәбір көріп отырғандарын айтады. Шағымда көрсетілгендей, осы екі лауазым иесі тергеушілердің нәтижелі жұмыс істеуіне кедергі келтіріп отыр. Басшылық тәжірибелі мамандардың ақыл-кеңесіне құлақ аспайды. Әріптестердің көзінше балағаттап, ар-намысына тиеді екен.
Тіпті қол астындағы мамандарға өндірістегі қылмыстық істерді жылы жауып, оң шешім шығару үшін іске қатысы бар азаматтармен "келісуге" бұйырады,— делінген шағымда.
Дәл қазір департамент ұжымында ауызбіршілік жоқ екен. Қызметкерлер өзара "Алматылық" және "Тараздық" болып екі топқа бөлінген. Басшылықпен бірге қызметке келген мамандар қателік жіберсе, ешқандай жауапкершілікке тартылмайтын көрінеді. Ал өзге қызметкерлер шалыс басқан жағдайда, сол сәтте жұмыстан қуылады екен.Мамытов пен Исабековке қарай сөйлеуден қалдық. Кез-келген жағдайда "Орныңды босат!" деп талап етеді. Сенбі-жексенбі, жылдағы еңбек демалысы дегенді ұмыттық. Жұмыстан кеш шығамыз, аптасына жеті күн орнымызда болуды талап етеді,
— дейді шағымданушылар.
Сондай-ақ, бұрын сыбайлас жемқорлық бабымен істі болған азамат департаменттің басшылық құрамына кірген екен. Шағымданушы топ осы және арызда көрсетілген басқа да мәселелердің ақ-қарасын ажыратып, кешенді тексеру жүргізу қажет дейді. Бұл өтініштерін олар ҚР Қаржылық мониторинг агенттігіне жолдамақшы.
Жергілікті департамент басшылығы болса мұндай шағымның бар екенін бізден естігендіктерін айтады. Барлық сұрақтарға тиісті жауап беріледі, алайда ол үшін біршама уақыт керек екенін айтты. Департаментке заңға сай сұраныс хат жолданды.
