Көкшетауда мектептен табылған жарылғыш затты оқушы қыз жасағаны белгілі болды
262
Көкшетаудағы №2 орта мектепте қолдан жасалған жарылғыш зат табылды. Полицейлер құрылғыны мектеп оқушыларының бірі жасағанын анықтады,- деп хабарлайды Opennews.kz ақпарат агенттігі Zakon.kz сайтына сілтеме жасап.Бұл туралы Ақмола облысының полиция департаменті мәлім етті.
Полиция қызметкерлері құрылғыны мектеп оқушыларының бірі (№2 орта мектеп. – ред.) жасағанын анықтады. Алдын ала белгілі болғандай, мұндай әрекетке қызды бұл оқу орнында оқуға құлықсыздығы себеп болған,- дейді Ақмола облысы полиция департаментінің баспасөз қызметі.
Ведомство бұл мәселе қосымша тексеріліп жатқанын мәлімдеді.
Кәмелетке толмағанды профилактикалық есепке қою жөніндегі мәселені ювеналдық полиция қызметкерлері шешеді,- деп хабарлады Ақмола облысы полиция департаментінің баспасөз қызметі.
Еске салсақ, 24 мамыр күні сағат 17:50-де Көкшетау қаласындағы №2 орта мектептің шаруашылық меңгерушісі полицияға қоймадан қолдан жасалған жарылғыш затқа ұқсас зат – сым салынған қаңылтыр банка табылды деген хабармен жүгінген. Полиция қызметкерлері аумақты қоршауға алып, оқу орнынан барлығын – 20 мұғалім мен мектептің 10 техникалық қызметкерін сыртқа шығарды. Адамдардың қауіпсіздігін қамтамасыз ету үшін бекітілген іс-қимыл алгоритміне сәйкес анықталған құрылғыны орнында жою туралы шешім қабылданды – қажетті қауіпсіздік шараларын сақтай отырып, қауіпсіз қашықтықта жарды.
