Жамбыл облысындағы жарылыс болған әскери бөлімде уақытша командирдің міндетін атқарған азамат енді 15 жылға дейін түрмеге жабылуы мүмкін. Оған қызметіне салғырт қарады және қару-жарақты сақтау, қолдану тәртібін бұзу баптарымен айып тағылған. Бірақ 35 жастағы бұрынғы әскери лауазым иесі өзін кінәсізбін дейді, деп хабарлайды КТК арнасына сілтеме жасаған Ulysmedia.kz. 

Аслан Бақытжановтың айтуынша, ол әскери бөлімдегі проблемаларды айтып, алты ай бойы хат жазумен болған. Алайда одан ешқандай нәтиже болмады, дейді ол.

Бақытжановтың сөзінше, әскери бөлімдегі техникалық ескерту құралдарының тозығы жеткені өзіне таяқ боп тиген. 

Бірақ бұрынғы әскери өрт дабылы мен бақылау камераларының істен шыққанын тиісті орындарға ертерек ескертіп, алты айда 8 мәрте хат жазғанын айтады. Оның сөзіне сенсек, басшылық ешбіріне жауап қатпаған.

Қоймадан шыққан түтінді алдын ала байқау мүмкіндігі болмай, ол жойқын жарылыстарға ұласқан.

Аслан Бақытжанов "дәл осы үшін айыптап, 15 жылға түрмеге жабу – барып тұрған бассыздық" дейді. Сондықтан ол істі әділ қарауды талап етіп отыр.

Еске салсақ, былтыр Байзақ ауданындағы қару-жарақ қоймасында жойқын жарылыс болып, 17 адамның өмірі қиылған. Оқыс оқиға кезінде жоғалып кеткен бір әскериден әлі күнге хабар жоқ.