“Қазақстанды әлемдік спорттың шыңында көрсеткім келеді”: Голубенко

18 қараша 2025, 13:14

2 531

20 жастағы қазақстандық киберспортшы Данил Голубенко Гонконгте өткен BLAST Rivals Finals Season 2 турнирінде жеңіске жетіп, чемпион атанды. Финалда ол бразилиялық FURIA құрамымен бірге Team Falcons командасын 3:1 есебімен ұтып, жарыстың басты трофейін иеленді, - деп хабарлайды "Opennews.kz" ақпарат агенттігі.

Жеңістен кейінгі сұхбатында Данил «Жыл жаңалығы» атағын алуға қарсы еместігін, бірақ басты мақсаты — турнирлерде топ жару екенін атап өтті.

«Әрине, “Жылдың жаңалығы” сыйлығын алу жақсы болар еді, бірақ ол мен үшін бірінші орында емес. Ең маңыздысы — турнирлерде жеңу. Содан кейін барып MVP болу немесе басқа жүлделерге қол жеткізуге болады. Мен үшін бастысы – трофей», – деді ол.

Сонымен қатар, Данил халықаралық аренада Қазақстанның атын асқақтатуды армандайтынын жеткізді.

«Мен өз елімді, өз туымды танытқым келеді. Қазақстан әрдайым жоғары деңгейде көрінсе екен деймін. Бұл – менің арманым. Қазақстанды әлемдік спорттың шыңында көрсеткім келеді», – деді киберспортшы.

Айта кетейік, бұл Голубенконың бір жыл ішіндегі үшінші ірі халықаралық жеңісі. Бұған дейін ол қыркүйекте өткен Fissure Playground 2 жарысында және Қытайдағы IEM Chengdu турнирінде топ жарып, екі жарыста да MVP атанған. Мұндай тұрақты жетістік киберспортта өте сирек кездеседі.