Танымал әнші Президентке ерекше ұсыныс жасады
The Limba лақап атымен танымал Қазақстандық әнші Мұхамедәлі Ахметжанов Президент Қасым-Жомарт Тоқаевқа ерекше ұсыныс жасады,- деп хабарлайды Opennews.kz ақпараттық агенттігі.
Өнер иесі Мемлекет басшысын үстел теннисінен достық кездесу өткізуге шақырған.
Әнші ұсынысын жариялаған бейнеролик арқылы жеткізген. Жасанды интеллект көмегімен жасалған видеода Қасым-Жомарт Тоқаев компьютерлік ойындағы ең мықты әрі жеңуі қиын "соңғы қарсылас" ретінде бейнеленген. Роликте Президент үстел теннисінен шебер ойын көрсетіп, тәжірибелі спортшы ретінде ұсынылған. The Limba Қасым-Жомарт Тоқаевтың бұл спорт түрімен ұзақ жылдар бойы айналысқанын білетінін айтып, онымен бір
партия ойнауды бұрыннан армандайтынын жеткізген.
"Қасым-Жомарт Кемелұлы, сіздің спорттық жолыңызды жақсы білемін. Сіз үстел теннисінен спорт шеберлігіне кандидатсыз. Сізбен бір партия ойнауды көптен бері армандаймын. Қазір өз деңгейім сізге лайықты қарсылық көрсетуге жетеді деп сенемін",- деді әнші.
Өнер иесі жазбасына Мемлекет басшысының үстел теннисі үстелінің жанында түскен суретін де қоса жариялаған. Қасым-Жомарт Тоқаев үстел теннисімен көп жылдан бері айналысып келеді. Ол Қазақстан үстел теннисі федерациясын 13 жыл басқарған және осы спорт түрінен спорт шеберлігіне кандидат атағына ие. Мемлекет басшысы бұған дейін ресми кездесулер кезінде Түркия президенті Режеп Тайип Ердоғанмен және Қытай төрағасы Си Цзиньпинмен де үстел теннисін ойнаған.
