Қазақ әжелері Нью-Йоркті тәнті етті: ұлттық киіммен сән апталығына шықты

Қазақстандық дизайнер Раушан Ануарбекованың коллекциясы Нью-Йорктегі Манхэттенде, 1010 Park Avenue мекенжайында таныстырылды. Көрсетілімнің басты ерекшелігі — «Әлемді таңғалдырған қазақ әжелері» жобасының қатысушылары болды, - деп хабарлайды Opennews.kz ақпарат агенттігі.

Халықаралық сән сахнасында әжелер «Алаша» деп аталатын коллекцияны көпшілік назарына ұсынды. Киім үлгілерінде дәстүрлі қазақ киімі заманауи элементтермен үйлестірілген.

Жобаның негізгі мақсаты — ұлттық киімді дәріптеу және шетелдік аудиторияны қазақ мәдениетімен таныстыру. Бұл жолы қазақ мәдениеті даналық пен абыройдың символы саналатын әже бейнесі арқылы көрсетілді.

Сән көрсетілімі басталмас бұрын жоба қатысушылары ұлттық киіммен Нью-Йорк көшелерін аралады. Осылайша олар қазақтың дәстүрлі киім үлгілерінің заманауи мегаполис стилімен үйлесім таба алатынын көрсетті.

Қазақтың ұлттық киімін әлемге таныту.

Раушан Ануарбекованың коллекциясы әйгілі француз сәнгері Кристиан Диордың музасы болған қазақ моделі Алла Ильчунға арналған. Биыл оның туғанына 100 жыл толды.

Дизайнердің айтуынша, киімдерді әзірлеу барысында Dior үлгілерінің кейбір пішім элементтері пайдаланылған. Алайда коллекция сәнгердің туындыларын немесе Алла Ильчунның стилін қайталамайды.

Раушан Ануарбекова Алла Ильчунның қазақ қызы болғанын және оның әлемдік сән индустриясына қосқан үлесі Қазақстан тарихы мен мәдениетінің бір бөлігі екенін атап өтті.

Дизайнер «Әлемді таңғалдырған қазақ әжелері» жобасының мақсаты тек ұлттық киімді көрсету емес екенін де айтты. Оның сөзінше, жобаға қатысушы әйелдердің әрқайсысының артында бала тәрбиелеп, еңбек етіп, отбасы мен елдің дамуына үлес қосқан өмір жолы жатыр.

Жоба қоғамдағы аға және жас буын арасындағы байланысты да көрсетуге бағытталған.

Жоба қатысушыларының бірі Тілекші Амангелдиеваның айтуынша, қазақстандық дизайнерлердің туындыларын шетелде таныстыру идеясы осы көрсетілімге дейін пайда болған.

Нью-Йоркте ол бұған дейін New York Fashion Week аясындағы іс-шараларға қатысқан Атыраудан келген сән саласының маманымен танысқан. Кейін олар бірлесіп дайындық жұмыстарын бастап, таныстырылымдар мен бейнероликтер әзірлеп, қазақстандық дизайнерлермен байланыс орнатқан.

Нәтижесінде Раушан Ануарбековамен байланысып, оның коллекциясын Нью-Йоркте таныстыру туралы шешім қабылданған.