Шиелі ауданында кең көлемді сенбілік өтеді
17-сәуір күні Шиелі ауданында тарихи-мәдени маңызы бар нысандар аумағында кең көлемді тазалық жұмыстары ұйымдастырылады. Іс-шара «Таза Қазақстан» акциясы аясында өтпек,-деп хабарлайды Оpennews.kz ақпараттық агенттігі.
Атап айтқанда, сенбілік киелі Оқшы ата кесенесі аумағында және Қаратау жотасының етегінде орналасқан Сауысқандық шатқалында жүргізіледі. Бұл шараның басты мақсаты – табиғатты қорғау, тарихи орындардың тазалығын сақтау және тұрғындардың экологиялық мәдениетін арттыру.
“Amanat” партиясы аудандық филиалының атқарушы хатшысы Жібек Баймұратова аудан тұрғындарын игі іске белсенді қатысуға шақырды. Оның айтуынша, туған жердің тазалығы – әрбір азаматтың ортақ жауапкершілігі.
Ұйымдастырушылардың пікірінше, киелі орындарды таза ұстау мен табиғатты аялау – қоғамның маңызды міндеттерінің бірі.
Осыған орай, аудан тұрғындары сенбілікке белсене қатысып, туған өлкенің көркеюіне өз үлестерін қоса алады.
