Қызылорда облысында жас жол инспекторларының ауданаралық слеті өтті
Қызылорда облысында Кеңес Одағының Батыры, Халық қаһарманы Ғазиз Байтасовтың құрметіне арналған «Жас жол инспекторларының» ХХІ республикалық слетінің ауданаралық кезеңі жоғары деңгейде ұйымдастырылды.
Ауқымды шараға облыстың жеті ауданынан іріктеліп келген жеті команда қатысып, өзара бақ сынасты. Слеттің негізгі мақсаты – жасөспірімдер арасында жол қозғалысы қауіпсіздігін насихаттау, құқықтық сауаттылықты арттыру, балаларды жауапкершілікке тәрбиелеу және жол-көлік оқиғаларының алдын алу. Салтанатты іс-шараның ашылу рәсіміне Қызылорда облысы Полиция департаменті бастығының орынбасары, полиция полковнигі Е.Абдраманов арнайы қатысып, жас жол инспекторлары қозғалысының қоғамдағы маңызына ерекше тоқталды. Ол өз сөзінде қазіргі таңда жол қозғалысы қауіпсіздігін қамтамасыз ету – мемлекеттік маңызы бар мәселелердің бірі екенін айтып өтті. Әсіресе балалар мен жасөспірімдердің жол ережелерін жетік меңгеруі, қауіпсіздік талаптарын сақтауы өте маңызды екенін жеткізді. Полиция полковнигі мұндай тәрбиелік әрі танымдық шаралар жас буынның құқықтық мәдениетін қалыптастыруға ықпал ететінін атап өтті. Сонымен қатар, жас инспекторлар болашақта қоғамға пайдалы, тәртіпке бағынатын азамат болып қалыптасатынын айтып, қатысушыларға сәттілік тіледі. Ол барлық командаларды білім мен шеберлік сындарында белсенділік танытып, жоғары нәтиже көрсетуге шақырды.
Ауданаралық слет барысында қатысушылар бірнеше кезең бойынша сынға түсті. Әр кезең балалардың жол қозғалысы ережелерін қаншалықты меңгергенін, жылдам шешім қабылдау қабілетін, шығармашылық деңгейін және тәжірибелік дағдыларын анықтауға бағытталды. Алғашқы кезеңдердің бірі үгіт-насихат жұмыстарына арналды. Командалар жол қауіпсіздігі тақырыбында сахналық қойылымдар ұсынып, көрермендерге тәрбиелік мәні зор көріністер көрсетті. Қатысушылар түрлі музыкалық композициялар, өлеңдер мен театрландырылған қойылымдар арқылы жол ережелерін сақтаудың маңызын жеткізді. Бұл кезеңде балалардың шығармашылық қабілеті, сахна мәдениеті және командалық үйлесімділігі бағаланды. Сондай-ақ жас инспекторлар жол жүру қағидалары бойынша тест тапсырмаларын орындады. Қатысушылар бағдаршам белгілері, жол белгілері, жаяу жүргіншілердің құқықтары мен міндеттері, көлік құралдарының қозғалыс тәртібі сияқты маңызды сұрақтарға жауап берді. Эрудиттік және логикалық сұрақтар кезеңінде оқушылардың тапқырлығы мен білім деңгейі сыналды.
«Жас санитар» кезеңі де ерекше қызығушылық тудырды. Бұл бөлімде қатысушылар алғашқы медициналық көмек көрсету бойынша теориялық және практикалық тапсырмаларды орындады. Оқушылар жарақат алған адамға алғашқы көмек көрсету, таңғыш салу, жедел әрекет ету тәсілдерін тәжірибе жүзінде көрсетті. Мұндай тапсырмалар балалардың төтенше жағдайда дұрыс әрекет етуіне дағдыландырады. Ал «Жас реттеуші» кезеңінде қатысушылар жол қозғалысын реттеу машықтарын көрсетті. Жас инспекторлар арнайы алаңда реттеушінің қимылдарын дәл әрі сауатты орындап, жол қозғалысын басқару ережелерін тәжірибе жүзінде дәлелдеді. Бұл кезең олардың шапшаңдығы мен жауапкершілігін айқындады. Слеттің ең тартысты бөлімдерінің бірі велосипедті мәнерлеп жүргізу сайысы болды. Қатысушылар арнайы дайындалған кедергілер жолағынан өтіп, велосипедті басқару шеберлігін көрсетті. Бұл кезеңде балалардың ептілігі, қозғалыс координациясы және қауіпсіздік ережелерін сақтау деңгейі бағаланды. Іс-шара барысында жас жол инспекторлары жол қауіпсіздігі мәдениетін насихаттап қана қоймай, өздерінің білімдері мен дайындықтарының жоғары деңгейде екенін дәлелдеді. Командалар арасындағы достық қарым-қатынас пен өзара қолдау ерекше байқалды. Ұйымдастырушылардың айтуынша, мұндай шаралар балалардың бос уақытын тиімді ұйымдастыруға, оларды тәртіпке, жауапкершілікке және ұйымшылдыққа тәрбиелеуге үлкен әсер етеді. Байқау қорытындысы бойынша І орынды Байқоңыр қаласының командасы жеңіп алды. Команда барлық кезеңдерде жоғары нәтиже көрсетіп, үздік атанды. ІІ орын Сырдария ауданының командасына бұйырса, ІІІ орынды Қармақшы ауданының жас инспекторлары иеленді. Сонымен қатар өзге қатысушылар да түрлі номинациялар бойынша марапатталып, арнайы дипломдар мен алғыс хаттарға ие болды.
Шара соңында ұйымдастырушылар жас жол инспекторлары қозғалысының маңызын тағы бір мәрте атап өтіп, алдағы уақытта да мұндай тәрбиелік мәні зор іс-шаралар жалғасатынын жеткізді. Қатысушылар мен жетекшілер ұйымдастырушыларға ризашылықтарын білдіріп, слеттің жоғары деңгейде өткенін айтты. Мамандардың пікірінше, жол қозғалысы мәдениетін қалыптастыру бала кезден басталуы тиіс. Сондықтан мұндай республикалық деңгейдегі слеттер жасөспірімдердің қауіпсіздік ережелерін меңгеруіне, құқықтық сауатын арттыруға және қоғамдағы жауапкершілігін қалыптастыруға зор ықпал етеді.
