АСТАНАДА 19 ЖАСАР ҚЫЗ ҚАЗА БОЛДЫ

Кеше, 17:00

2 557

Астана қаласында 19 жастағы Назымның қазасы оның отбасы мен жақындарын қара жамылдырды. Жас қыз елордаға небәрі бір жарым ай бұрын жұмыс істеу үшін кеткен. Қазір оның өліміне қатысты түрлі сұрақ туындап, жақындары оқиғаның барлық мән-жайы толық әрі объективті зерттелуін сұрап отыр, - деп хабарлайды Opennews.kz ақпараттық агенттігі.

2026 жылғы 26 тамызда Астана қаласында 19 жастағы Назым көз жұмды. Жақындарының айтуынша, жас қыз елордаға шамамен бір жарым ай бұрын жұмыс істеу мақсатында барған. Отбасына көмектесіп, тапқан табысынан үйіне ақша жіберіп отырған. Назымды жақын білетін құрбылары оның өмірге құштар, еңбекқор әрі көңілді болғанын айтады.

«Назым бізбен бес жыл бойы жақын араласты. Бес саусақтай бірге жүрдік. Бір-біріміздің барлық сырымызды білдік. Ол үнемі күліп жүретін, ашық-жарқын қыз еді. Ешқашан бізбен бет жыртысып, қатты ұрысып көрген емес», – дейді құрбылары.

Олардың сөзінше, Назымның Астанаға барудағы мақсаты – жұмыс істеп, отбасына көмектесу болған.

«Астанаға өлемін деп емес, өнемін деп барды», – дейді оның құрбылары.

Құрбыларының айтуынша, Назым Астанада жүрген соңғы бір-екі апта ішінде Қызылорда қаласынан таныс Аяулым есімді қызбен араласқан. Жақындарының мәліметінше, Астанада Назымның басқа жақын таныстары көп болмағандықтан, осы қызбен бірге уақыт өткізген, қыдырған.

Қайғылы жағдай болған 26 тамыз күні Назымды Аяулым отырысқа шақырғаны айтылады. Назым сол кеште әпкесінің үйінен сұранып шыққан. Алайда кейін үйіне қайта оралмаған.

Құрбыларының мәліметінше, сол жерде А және М есімді екі жігіт те болған. Оқиғаның дәл осы кезеңіне қатысты бірқатар жайт жақындарының көңілінде сұрақ қалдырып отыр.

Қазіргі таңда Назымның өліміне қатысты «өз-өзіне қол жұмсау» нұсқасы қарастырылып жатқаны туралы жақындарына ақпарат жеткен. Алайда құрбылары бұл нұсқа бойынша барлық мән-жай толық зерттелді деп айтуға әлі ерте деп есептейді. Олардың айтуынша, оқиға орнында болған адамдардың түсініктемелерінде өздері үшін түсініксіз тұстар бар.

Мәселен, құрбыларының айтуынша, сол жерде болған Аяулым есімді қыз оқиға кезінде Назымның жанында болғанына қарамастан, кейінгі түсініктемелерінде оның қасында болмағанын және оқиға қалай болғанын білмейтінін айтқан. Бұл мәліметтердің қаншалықты шындыққа сәйкес келетіні тергеу барысында анықталуы тиіс.

Құрбылары үшін тағы бір маңызды мәселе – жедел жәрдем шақырылған уақыт. Олардың қолындағы мәлімет бойынша, Назым биіктіктен құлағаннан кейін жедел жәрдем шамамен бір сағаттан соң шақырылған болуы мүмкін. Егер бұл ақпарат расталса, жедел жәрдемнің не себепті дәл сол уақытта шақырылғаны да анықталуы қажет.

Қайғылы оқиғадан кейін Назымның ұялы телефонына қатысты да сұрақтар туындаған. Құрбыларының айтуынша, телефон біраз уақыт Аяулымның қыздың қолында болған және ол Назымның телефонының құпиясөзін білген.

Сондай-ақ жақындары телефондағы кейбір ақпараттың өшірілген болуы мүмкін деген күдік білдіреді. Алайда бұл мәліметтер әзірге тәуелсіз түрде расталған жоқ. Сондықтан телефондағы қоңыраулар, хат-хабарлар, әлеуметтік желілердегі белсенділік және басқа да цифрлық деректердің өзгертілген-өзгертілмегенін тиісті сараптама арқылы анықтау маңызды.

Назымның жақындары ешкімді алдын ала кінәлі деп жариялаудан аулақ екенін айтады. Олардың негізгі талабы қайғылы жағдайдың барлық нұсқасы толық қаралып, оқиғаға қатысты әрбір сұраққа нақты жауап берілуі.

«Бізге сенсация емес, шындық керек»

Назымның құрбылары бұл оқиғаны қоғам назарына шығарудағы мақсаттарының біреуді қаралау немесе кінәлау емес екенін айтады. Олар тек жас қыздың өліміне қатысты барлық күмән мен сұрақтың заң аясында зерттелгенін қалайды.

«Біз ешкімді кінәлі деп жарияламаймыз. Біреуге жала жабу ниетіміз де жоқ. Бізге тек 26 тамызда нақты не болғанын білу керек. Назымның отбасы шындықты білуге құқылы», – дейді олар.

19 жастағы қыздың өмірі енді ғана басталып келе жатқан еді. Ол туған қаласынан елордаға жұмыс істеу, ақша табу және отбасына көмектесу үшін барған. Қазір оның жақындары бір ғана сұрақтың нақты жауабын күтеді: 26 тамыз күні Назыммен шын мәнінде не болды?

Бұл сұрақтың жауабы тек жан-жақты әрі объективті тергеу нәтижесінде анықталуы мүмкін. Назымның құрбылары құқық қорғау органдарынан істің барлық мән-жайын мұқият тексеріп, болған жағдайға қатысты күмән тудырған сұрақтардың әрқайсысына құқықтық баға беруді сұрайды. Бұл – 19 жастағы қыздың өліміне қатысты шындықты білуге деген отбасы мен жақындарының талабы.

Материалда айтылған күмәндар мен мәліметтер Назымның жақындары мен құрбылары ұсынған ақпаратқа негізделген. Олардың шынайылығы тиісті тексеру және тергеу нәтижесінде анықталуы тиіс. Аталған адамдардың кінәсі соттың заңды күшіне енген үкімімен дәлелденген жоқ.