Жоқ адамдарды жұмысқа алған мектеп пен балабақша басшылары 20 млн теңгедей залал келтірген
Абай облысында балабақшалар мен мектептердің қаржылық қызметіне тексеріс жүргізілді, нәтижесінде аса ірі көлемде ақша жымқырылғаны анықталды, - деп хабарлайды "Opennews.kz" ақпарат агенттігі.
Абай облысының мектепке дейінгі және орта білім беру мекемелерінің қызметінде белгілі бір сыйақы үшін кадр мәселелерін шешу, жалақыны есептеу кезінде айла, жалған аттестаттар мен сертификаттар беру, сондай-ақ мемлекеттік сатып алуды өткізу кезінде алаяқтық байқалды.
"Өткен жылдардағы статистикалық мәліметтерге сәйкес, білім беру саласындағы сыбайлас жемқорлық қылмыстардың негізгі үлесі мектеп директорлары мен бухгалтерлеріне, балабақша меңгерушілеріне, білім басқармалары мен бөлімдерінің басшылары мен мамандарына тиесілі. Бүгін де жағдай өзгерген жоқ", – деп атап өтті ҚР Сыбайлас жемқорлыққа қарсы іс-қимыл агенттігінің Абай облысы бойынша департаменті басшысының бірінші орынбасары Рүстем Тоқбергенов.
Бюджет қаражатын жымқыру схемалары Семейде, сондай-ақ Аягөз, Абай, Жарма, Үржар және Көкпекті аудандарында анықталды. Үш директор, алты бухгалтер және бір экономист айыпталды.
"Бүгінгі таңда төрт факт бойынша сотқа дейінгі тергеулер тіркелген. Келтірілген залалдың жалпы сомасы 19,7 млн теңге", – деді ол.
21 маусымда Жарма аудандық соты жергілікті балабақша бухгалтерін 2,4 млн теңге көлемінде бюджет қаражатын иемденгені үшін кінәлі деп таныды. Сот үкімі бойынша 2,6 жыл мерзімге бас бостандығынан айыру жазасы тағайындалды, жаза мерзімін өтеу бес жылға кейінге қалдырылды. Үкім әлі заңды күшіне енген жоқ.
Үржар ауданында да бухгалтер өзіне артығымен жалақы аударып, үш жыл ішінде 3,9 млн теңге жымқырған.
Көкпекті ауданында балабақша меңгерушісі ағылшын тілі мұғалімі ретінде ай сайын 168 мың теңгеден қосымша жалақы алып отырды. Алайда бүлдіршіндер үшін ағылшын тілін оқыту мүлдем қарастырылмаған.
"Ұрлаудың тағы бір кең таралған тәсілі – жоқ адамдарды жұмысқа қабылдап, оларға жалақы төлеу. Мұнда директор өзінің таныстары мен туыстарын жұмысқа қабылдау туралы жалған бұйрық шығарады", – деп атап өтті Рүстем Тоқбергенов.
Семейдегі балабақшалардың бірінде менеджер жоқ төрт адамды жұмысқа алып, олардың ақшасын алып отырған. Залал сомасы 2,6 млн теңгеге жетті.
