Қызылордада оқушы қызды сексуалдық құлдықта ұстаған басты күдіктілерге үкім шықты

Кеше, 14:52

5 193

Қызылордада кәмелетке толмаған қызды жыныстық құлдыққа салған басты фигуранттарға үкім шықты, - деп хабарлайды "Opennews.kz" ақпарат агенттігі.

2025 жылдың қаңтар айынан бастап Қызылорданың кәмелетке толмағандар істері жөніндегі сотында кәмелетке толмаған қыз баланы сексуалдық құлдыққа салу ісі бойынша негізгі сот отырысы өтіп жатыр. Қазір тоғыз адам сотқа тартылды, олардың арасында кәмелетке толмағандары да бар.

Барлық сот отырысы жабық режимде өткізілуде. Бүгін соттың соңғы отырысында айыпталушыларға үкім шығып 4 жыл 8 айдан 7 жыл 6 айға дейін бас бостандығынан айырылды.

Қылмыстық кодекстің 194-бабы “Ірі мөлшердегі мүлікті алу мақсатында бопсалау”, 110-бабы “Кәмелетке толмаған адамды азаптау”, 134-бабы “Кәмелетке толмаған адамды жезөкшелікке тарту” бойынша айыпталған бір топ адамға қатысты қылмыстық іс қаралды.

Сотталушылардың кінәсі оқиға болған жерді қарау хаттамаларымен, заттар мен құжаттарды тексеру нәтижелерімен, бейнежазбалармен, WhatsApp мессенджеріндегі хат-хабарлармен, банк шоттарынан алынған үзінділермен, сараптама қорытындыларымен, сондай-ақ жәбірленушінің айғақтарымен дәлелденді.

“Сот үкімімен кәмелетке толмаған М, А, Қ-ға 6 жыл 8 ай мерзімге бас бостандығынан айыру жазасы тағайындалды. Б 4 жыл 8 ай мерзімге бас бостандығынан айырылды. Т мен Қ кінәлі деп танылып, оларға 4 жыл 8 ай мерзімге бас бостандығынан айыру жазасы тағайындалды. Тағы үшеуіне 7 жыл 6 ай мерзімге бас бостандығынан айыру жазасы тағайындалды," – деп мәлімдеді Қызылорда облысының кәмелетке толмағандар істері жөніндегі мамандандырылған ауданаралық сотының әкімшісі Даурен Таиров.

Еске салсақ, бұған дейін Қызылордада №7 мектептің жоғары сынып оқушысы 16 жастағы қызды сыныптастары жезөкшелікпен айналысуға мәжбүрледі деген күдікке ілінгені туралы жазған едік. Сотталушылардың ішінде сыныптастары мен бопсалаушылар және де ұрып соққан жалдамалы қыздар да бар. Ішкі істер вице-министрі Игорь Лепеха аталмыш іс бойынша 13 күдікті ұсталғанын мәлімдеді. Сексуалды құлдықта болған 16 жастағы қыз сараптама кезінде қысым көргенін айтып шағымданған еді. Бұл іс бойынша сот бүгінгі күнге дейін істі бірнеше баппен қарап, 4 рет үкім шығарған болатын.