Бала күтімінде отырған аналар еңбек демалысын қалай алады?

Қазақстанда бала күтімімен үйде отырған аналардың еңбек құқықтары қорғалады. Еңбек және халықты әлеуметтік қорғау министрлігінің хабарлауынша, Еңбек кодексіне сәйкес, бала үш жасқа толғанға дейінгі кезеңде жүктілік және босану бойынша демалыста болған әйелдер жыл сайынғы ақылы еңбек демалысын алу құқығын сақтайды, - деп хабарлайды "Opennews.kz" ақпарат агенттігі.

Бұл норма аналардың еңбек өтілін үзбеуге және демалыс алу құқығын шектеуге жол бермеуге бағытталған.

Министрлік атап өткендей, Еңбек кодексінің 91-бабына сәйкес, әрбір қызметкер жыл сайынғы ақылы еңбек демалысына құқылы, ал жұмыс беруші оны беруге міндетті.

Еңбек демалысын есептеу кезінде еңбек өтіліне қосылатын кезеңдер:

• Нақты жұмыс істеген уақыт;
• Жұмыс орны мен жалақысы сақталған кезеңдер;
• Уақытша еңбекке жарамсыздық мерзімі (соның ішінде жүктілік пен босану демалысы);
• Жұмыстан заңсыз босатылғаннан кейін, қызметкердің жұмысқа қайта орналасуына дейінгі кезең.

Ал жалақы сақталмайтын демалыс еңбек өтіліне қосылмайды. Мұндай жағдайда, еңбек демалысы нақты істеген уақытына қарай есептеледі немесе толық берілмейді, тек келісім бойынша белгілі бір бөлігі ұсынылады.