Мектепте телефон қолданған оқушылардың ата-аналарына айыппұл салынуы мүмкін

5 қараша 2025, 09:31

1 566

Қазақстандық оқушылар сабақ кезінде телефон пайдаланса, олардың ата-аналары әкімшілік жауапкершілікке тартылуы ықтимал, - деп хабарлайды "Opennews.kz" ақпарат агенттігі 31-арнаның “Информбюро” бағдарламасына сілтеме жасап.

Жаңа талаптардың басты мақсаты – балалардың сабақта толықтай оқу процесіне назар аударуына мүмкіндік жасау. Сарапшылардың пікірінше, телефон қоңыраулары мен хабарламаларға алаңдамайтын оқушылардың үлгерімі артып, тәртіп те жақсарады.

Ережеге сәйкес, егер оқушы сабақ үстінде телефон қолданса, жауапкершілік ата-анасына жүктеледі.

“Мұндай жағдайлар жиі кездеседі. Мұғалімдер барлық оқушыларға ‘телефонды сөндіріңдер’ дейді, бірақ кейбіреулері ‘ата-анам рұқсат бермейді, байланыс үзіліп қалмауы керек’ деп жауап береді. Ал оқу – зейінді қажет ететін күрделі процесс”, – дейді Мәжіліс депутаты Ирина Смирнова.

Бірінші рет ереже бұзғандарға ескерту жасалады. Ал қайталанса, 5 айлық есептік көрсеткіш (шамамен 19,5 мың теңге) көлемінде айыппұл салынады. Бұл айыппұлды мектеп әкімшілігінің шақыруымен келген полиция қызметкері рәсімдей алады.

“Бүгінде бұл шара қажет. Себебі оқушылар сабақ үстінде жиі алаңдап кетеді. Телефонды тек уақытты қарау үшін ашса да, кейін түрлі қосымшаларға кіріп кетеді”, – дейді А.С. Пушкин атындағы №1 мектеп-гимназиясының мұғалімі Феруза Мирзарахимова.

Көптеген ата-аналар бұл бастаманы қолдайды. Олардың айтуынша, балалар үйде де телефон мен ойындарға жиі алданып кетеді. Дегенмен кейбір ата-аналар баламен байланыс үзілмеуі керектігін де айтады.

“Мен балама телефон ұстауға рұқсат етемін, себебі оның қосымша сабақтары бар, байланыс үшін керек. Бірақ мектепте телефондарды жинап алады: бірінші сабақта сынып жетекшісі жинап, соңғысында қайта береді. Маған хабарласу қажет болса, сынып жетекшісіне жазамын, ол балама жеткізеді”, – дейді ата-ана Гүлжамал Сопбекова.