Қаз
Рус
Байқоңырдан ұшырылған ресейлік зымыран қалдықтары Ұлытау облысы тұрғындарын шошытты
5 052
Ұлытау облысында далалық аймақтан табылған зымыран қалдықтары жергілікті тұрғындардың зәресін алды. Жасанды интеллект және цифрлық даму министрлігі болған жағдайды түсіндірді, - деп хабарлайды "Opennews.kz" ақпарат агенттігі.
Әлеуметтік желіде далада табылған зымыраның видеосы тарады. Видео Halyqstan Telegram арнасында жариялады.
“27 қарашада сағат 14:27-де Астана уақыты бойынша “Байқоңыр” ғарыш айлағынан экипаждық кемесі бар “Союз МС-28” тасымалдаушы зымыраны сәтті ұшырылды. Ұшыру жоспарға сәйкес өтті”, – деп мәлімдеді Жасанды интеллект және цифрлық даму министрлігі.
Министрліктің мәліметінше, зымыранның бірінші сатысы аталған аймаққа, Ұлытау облысындағы елді мекендерден алыс жерге түскен. Ведомство халыққа ешқандай қауіп жоқ деп сендірді.
Сондай-ақ оқиға орнына “Роскосмос” өкілдері мен Қазақстан мен Ресейдің экологтары келді. Олар өлшеу жұмыстарын жүргізіп, сынамалар алып жатыр.
Алдын ала мәліметтерге сәйкес, зымыран қалдықтарының экологияға зиян жоқ екені анықталды.
“Союз МС-28” экологиялық тұрғыдан қауіпсіз отынды пайдаланады, яғни керосин және сұйық оттегі. Құлаған қалдықтар радиациялық, химиялық немесе биологиялық қауіп төндірмейді”, — делінген жауапта.
