"Енді 1414-тен SMS код келмейді": Жеке деректерге қол жеткізу ережесі қатаңдатылмақ
Азаматтардың жеке деректерін қорғау шаралары күшейтіледі,-деп хабарлайды Opennews.kz ақпарат агенттігі.
Жасанды интеллект және цифрлық даму министрлігінің мәліметінше, бұған дейін кейбір мемлекеттік сервистерге бір реттік 1414 SMS-коды арқылы кіру мүмкіндігі болған. Алайда мұндай тәсіл арқылы алаяқтар азаматтардың телефон нөміріне жалған хабарлама жіберіп, жеке деректеріне қол жеткізуде.
Осыған байланысты 1414-тен SMS-код жіберу тәжірибесі тоқтатылады. Енді ақпараттық жүйелерге кіру тек биометриялық аутентификация, ЭЦҚ немесе арнайы QR-код арқылы жүзеге асырылады.
Қорғалу талаптарын осы айдан бастап орындамаған жүйелер 1414 SMS-шлюзінен ажыратылмақ.
Сонымен қатар азаматтардың цифрлық сауаттылығын арттыру мақсатында eGov Mobile қосымшасында кибергигиена, күмәнді әрекеттерді анықтау және цифрлық сервистерді қауіпсіз пайдалану бойынша ақпараттық баннерлер орналастырылған.
