Коллекторлық агенттіктерде ірі салық заңбұзушылықтары анықталған
Қаржы министрлігіне қарасты мемлекеттік кірістер комитеті дерегінше, кейбір компаниялар табысын жасырып, миллиардтаған теңгені салықтан тыс қалдырған,- деп хабарлайды Opennews.kz ақпарат агенттігі Stan.kz сайтына сілтеме жасап.
Қазақстанда коллекторлық агенттіктердің қызметіне жүргізілген тексеру барысында ірі көлемдегі салықтық заңбұзушылықтар анықталған.
Тексеру нәтижелеріне сәйкес:
- 7 коллекторлық агенттікте табысты 11,8 миллиард теңгеге асырып көрсету фактісі анықталды;
- төленбеген қосылған құн салығы (ҚҚС) 128 миллион теңгені құрады;
- ҚҚС бойынша есепке тұрмағаны үшін 1,6 миллиард теңге көлемінде қосымша салық есептелді.
Сонымен қатар қосымша 15 салық төлеуші анықталған. Олардың ықтимал табыс көлемі 61,6 миллиард теңгеге жетуі мүмкін. Ал төленбеген қосылған құн салығының сомасы шамамен 7,4 миллиард теңгені құрайды. Тексеру барысында кейбір агенттіктер салықтық міндеттемелерді азайту мақсатында арнайы схема қолданғаны белгілі болды.
Механизмі:
- агенттік банктерден берешекті номиналдан төмен бағамен сатып алады;
- кейін борышкерлерден толық немесе ішінара қаражат өндіріп алады;
- алынған қаражат “қарызды қайтару” ретінде рәсімделеді;
- осы арқылы операциялар ҚҚС-тан босатылған ретінде көрсетіледі.
Комитеттің түсіндіруінше, берешекті сатып алу құны мен нақты өндірілген қаражат арасындағы айырма коллекторлық қызметтен түскен табыс болып саналады. Кей жағдайларда дәл осы табыс салық салынатын айналымға енгізілмеген.
“Қарыз операциялары ретінде көрсетілгенімен, іс жүзінде бұл салық салынуға тиіс сыйақы,”- деп атап өтті ведомство.
Мемлекеттік кірістер комитеті анықталған заңбұзушылықтардың жүйелі сипатқа ие екенін және мұндай схемаларды басқа компаниялар да қолдануы мүмкін екенін мәлімдеді. Қазіргі уақытта қосымша анықталған 15 компанияға қатысты жан-жақты тексеру жүргізілуде. Комитеттің мәліметінше, кез келген қызметтен түскен табыс, оның қалай рәсімделгеніне қарамастан, міндетті түрде салық салуға жатады.
