Қызылорда облысының тұрғындары көпір құрылысын жиырма жылдан бері күтіп жүр
412
Қызылорда облысы Қазалы ауданына қарасты он ауыл округінің тұрғындары Сырдария өзені арқылы өтетін жаңа көпірдің құрылысын күтіп жүргеніне жиырма жылға жуықтапты. Ауыл тұрғындары осы жылдар бойы арғы бетке "Карлан" понтондық паромы арқылы өтіп жүр, бірақ оның қыста қатып қалу, жазда судың аздығы, көктемде су тасқыны сияқты өз қиындықтары бар, - деп хабарлайды Opennews.kz ақпарат агенттігі "Хабар 24" арнасына сілтеме жасап.Өзен Қазалы ауданын екіге бөледі. Бір жағында әкімшілік орталық, жұмыс орындары мен ауруханалар, екінші жағында – егістік алқап және туристер көп келетін көне Жанкент қаласы бар.
Жергілікті билік бұл мәселені бірнеше жыл бойы шешуге тырысқанымен, енді ғана іске кірісп жатыр. Жаңа автокөпір құрылысына мемлекет 4 млрд теңге бөледі.
"Нысанның жалпы ұзындығы шамамен 2,5 шақырымды құрайды. Өткел екі жолақты болады. Жобада жаяу жүргіншілерге арналған тротуар да қарастырылған. Қазір мердігер компания анықталып жатыр. Құрылыс жұмыстары келесі жылы басталады", - деді Қазалы аудандық тұрғын үй-коммуналдық шаруашылық, жолаушылар көлігі және автомобиль жолдары бөлімінің бастығы Мұрат Әбсұлтанов.
