Зейнетақы жинағындағы ақшаны пайдаланудың тағы бір тәсілі ұсынылды

Қазақстанда зейнетақы жинақтарының бір бөлігін қазақстандық компаниялардың акцияларын сатып алуға пайдалану ұсынылды, деп хабарлайды Ulysmedia.kz LS-ке сілтеме жасап. 

Мұндай ұсынысты миноритарлық акционерлер қауымдастығы (QAMS) жасады. 

"Қазақстандық компаниялардың акцияларын сатып алу үшін зейнетақы жинақтарын пайдалану бойынша заңнаманы өзгерту мүмкіндігін қарастыру қажет. Ол үшін АҚШ-тағы 401k шотына ұқсас мамандандырылған инвестициялық шотты пайдалануға болады. Бұл шара қазақстандықтарға шешім қабылдау кезінде БЖЗҚ-ға тәуелді болмауға, инвестицияларды өз бетінше жүзеге асыруға, сондай-ақ акционерлер жиналыстарында дауыс беру арқылы компанияны басқаруға қатысуға мүмкіндік береді",  – деп атап өтті QAMS.

Айта кетейік, елімізде зейнетақы жинақтары жеткіліктілік шегінен жоғары болса,  емделу, тұрғын үй жағдайын жақсарту үшін пайдалануға немесе басқарушы компанияларға беруге болады.